"Söhbəti bilmədən söyüş söymə”.

Bakı Ağır Cinayətlər Məhkəməsində Sumqayıt ş. sakini Ağakərim Abdullayevin (1988-ci il təv.) CM-nin 120.2.2 (xuliqanlıq niyyəti ilə qəsdən adam öldürmə) və 228.4-cü (qanunsuz olaraq soyuq silahı əldə etmə, satma və gəzdirmə) maddələri ilə təqsirləndirilməsinə dair cinayət işi üzrə məhkəmə baxışı yekunlaşıb.

İttiham aktına əsasən, ötən il sentyabrın 22-də axşam saat 17.30 radələrində Köhnə Corat qəsəbəsində şəxsi münasibətlərin aydınlaşdırılması zəminində Ağakərim Abdullayev Qubadlı rayon sakini Əbülfət Şıxəliyevə bıçaq zərbələri vurmaqla, onu qətlə yetirib. Həmin gecə o 1-ci polis bölməsinin əməkdaşları tərəfindən saxlanılıb.

İstintaqla müəyyən olunub ki, Ağakərim Abdullayev həmin gün bir nəfər tanışı ilə taksi ilə Corata, 389 nömrəli aptekin qarşısına gəlib. Sürücüyə pul verərkən məbləğlə əlaqədar əvvəlcə aralarında narazılıq yaranıb, amma sonra anlaşılmazlıq həll edilib. Aptekin qarşısından keçəndə orda dayanan tanımadığı şəxslərdən biri ünvanına söyüş söyüb. Ağakərim onu tanımadığı təqdirdə, nə üçün söyüş söydüyünü soruşduqda, Əbülfət Şıxəliyev ona "taksi sürücüsünə atdığına görə söyürəm” deyib. Cavab olaraq Abdullayev "söhbəti bilmədən söyüş söymə” söyləyib və onu əli ilə sinəsindən itələyib.

Şıxəliyev valideynlərini söyüb, yerdən taxta parçası götürüb və üstünə gəlib, Ağakərim isə şalvarının belindən açılıb-qatlanan bıçağı çıxarıb və ona 1-2 zərbə vurub. Əbülfət yerdən daş götürüb ona tərəf atmaq istədikdə, Ağakərim onun əlinin altından keçib və zərbədən yayınıb. Sonra bıçaqla Şıxəliyevin sağ qol nahiyyəsinə xəsarət yetirib. Hadisə yerində olan 5-6 nəfər onları ayırıb, Ağakərim əlində bıçaq evinə tərəf qaçıb. Baş vermiş hadisədən şokda olduğundan tutduğu aləti gizlətmək üçün münasib yer axtarıb. Ətrafa diqqətlə baxıb, bıçağı hasarda olan rezin borunun içərisində gizlədib. Təxminən 25-30 dəqiqədən sonra o polis əməkdaşları tərəfindən saxlanılıb. Bölmədə olarkən Ə.Şıxəliyevin xəstəxanada artıq öldüyünü eşidib. 

DİN-dən alınan tələbnaməyə əsasən, A.Abdullayev CM-nin 234.1-ci (satış məqsədi olmadan qanunsuz olaraq narkotik vasitələri istehlak miqdarından artıq miqdarda əldə etmə və ya saxlama) maddəsi ilə iki dəfə cinayət məsuliyyətinə cəlb olunub. 

Məhkəmə prosesində A.Abdullayev elan olunan ittiham üzrə özünü qismən təqsirli hesab edib. 

Məhkəmənin hökmü ilə təqsirləndirilən şəxs 14 il müddətinə azadlıqdan məhrumetmə cəzasına məhkum olunub.  (oxu.az)