Ötən gün Sumqayıtda "Nəsimi" adına Mədəniyyət və İstirahət Parkının ərazisindəki körpünün söküldüyü barədə məlumat vermişdik. Gənclər arasında "Sevgi körpüsü" kimi adlandırılan körpü sumqayıtlıların çox sevimli məkanı idi. Söküntü şəhər rəhbərliyinin sözügedən parkın abadlaşdırılması istiqamətində apardığı işlər çərçivəsində həyata keçirilib.

Məsələ ilə bağlı Sumqayıt şəhər Mənzil Kommunal Təsərrüfatı İstehsalat Birliyinin rəisi “Xeberle.com” –a açıqlama verib.  A.Əliyev körpünün istismar müddətinin keçdiyini və dənizə olan hissəsində əyrilik olduğunu qeyd edib: “Körpüdə əyrilik var idi. Piyada körpüsünün sökülməsi də bu səbəbdəndir”.

Birliyin rəisi ərazidə müasir formada yeni körpünün inşa olunacağını da sözlərinə əlavə edib. A.Əliyev   körpünün keçdiyi ərazidə funikulyorun tikiləcəyi ilə bağlı mətbuatda yayılan məlumatlara da münasibət bildirib: “Körpü olan ərazidə funikulyor inşa olunmayacaq. Amma Sumqayıtda funikulyorun olacağını istisna etmirik. Mütəxəssislər bununla bağlı dəyərləndirmələr aparırlar, sadəcə hələlik buna müvafiq relyef tapmaqda çətinlik çəkirik”.

Xeberle.com