Bir həftədən çoxdur ki, Bakı-Sumqayıt yolunun paytaxta giriş istiqamətində tıxac müşahidə olunur. Belə ki, Biləcəridən Ekologiya postunu keçdikdən bir qədər sonra başlayan avtomobil sıxlığı Bakı Beynəlxalq Avtovağzalının qarşısına qədər davam edir. Xırdalan istiqamətindən gələn maşınlar azı 1 saat burada tıxacda qalırlar.
Həmin ərazidə tıxacın yaranmasının səbəbi avtovağzalın qarşısında yolun qazılmasıdır. Belə ki, şoseni yenidən asfaltlamaq üçün qaşıyıb dağıdıblar. Həmin yerə çatdıqda avtomobillər sürəti 10 km/saata endirməli olurlar. Çünki asfalt dağıdılan hissədə yol kəsiyi hərəkətə mane olur, oradan sürətlə keçən avtomobilə ciddi ziyan dəyə bilər. Ona görə də sürücülər sürəti azaltmağa məcburdur. Bu isə tıxaca səbəb olur. Məsələ ondadır ki, yolu 1 həftə öncə qazsalar da, bu günədək orada təmir-bərpa işləri başlamayıb. (musavat.com)
Xəbərdən istifadə edərkən istinad etmək vacibdir.
