Məlum olduğu kimi, ölkə rəhbərliyi tərəfindən şəhid ailələri, döyüşlərdə yaralananlar və müharibə iştirakçıları daim diqqətdə saxlanılır, dövlətin qayğısı ilə əhatə olunurlar. Mədəniyyət Nazirliyi bu kateqoriyadan olan şəxsləri daim diqqətdə saxlayır, əlamətdar günlərdə onları ziyarət edir, mövcud problemlərinin həlli məqsədilə müvafiq dəstək tədbirləri görür və onların mədəniyyət müəssisələrində işlə təmin olunmasına xüsusi önəm verir.
Növbəti belə tədbir İslam aləmində ən müqəddəs və əziz bayramlardan biri olan Qurban bayramı ərəfəsində Sumqayıt Regional Mədəniyyət İdarəsi tərəfindən keçirilib.
Bu Müqəddəs bayram münasibətilə Sumqayıt Regional Mədəniyyət İdarəsinin kollektivi Azərbaycan Qızıl Aypara Cəmiyyəti ilə birgə şəhid ailələrinin və qazilərimizin qonağı olub, bayram sevincini onlarla birgə bölüşüb.
Şəhid ailələri və qazilər onlara göstərilən davamlı diqqət və dövlət qayğısına görə ölkə rəhbərliyinə öz dərin təşəkkürlərini ifadə ediblər.
Xəbərdən istifadə edərkən istinad etmək vacibdir.
