"Gələn il Sumqayıtda yeni qazanxalar istismara veriləcək”

Regionların "Sosial–iqtisadi inkişafı dövlət proqramı”na  əsasən 2005-ci ildən 2018-ci ilədək Bakı və respublikanın regionları, o cümlədən Sumqayıt şəhərinin istiliklə təmin edilməsinin başa çatdırılması nəzərdə tutulur.

Regionlar da daxil olmaqla, Sumqayıtda istilik təchizatı çox ləng aparılıdığına görə, prosesin 2018-ci ilə qədər başa çatdırılacağına olan ümidləri azaldır. Sumqayıt şəhərində "kombi” istifadəçilərinin sayı gündən-günə artmaqda davam edir. Nəticədə şəhər üçün ayrılan mavi yanacaq sakinlərin artan tələbatını ödəmir. Bir problem başqa bir problemin yaranmasına gətirib çıxarır.

"Azəristiliktəchizat" ASC abonent və müştəri xidmətinin rəisi Rafiq Əliyev isə tamamilə fərqli düşünür. Xidmət sədri belə hesab edir ki, istilik təchizatı ilə bağlı regionlar arasında ən çox iş Sumqayıt şəhərində görülüb. R.Əliyev bildirdi ki, regionların "Sosial-iqtisadi inkişafı dövlət proqramı”na uyğun olaraq "Azəristiliktəchizat” ASC istilik qazanxanalarının tikintisini mərhələli şəkildə, yəni layihə üzrə həyata keçirir. Region təkcə Sumqayıt şəhərindən ibarət deyil. İstilik qazanxanaların tikintisi ardıcıl olaraq, davamlı şəkildə bütün regionlar üzrə aparılır. Bizdən asılı olsa, Bakı şəhəri və regionların istilik təchizatını 2018-ci ildən daha tez, elə bu il sona çatdırardıq”, - deyə xidmət rəisi qeyd etdi.

"Sumqayıtistiliktəchizat” idarəsinin rəisi Aftandil Nuriyev "Azəristiliktəchizat” ASC-nin 2005-ci ildən Sumqayıt şəhərində istilik təchizatı ilə bağlı gördüyü işlərin hesabatını Xeberle.com-a açıqladı.

Prezidentin 2005-ci il sərəncamından sonra Respublikada istiliyin bərpası ilə bağlı "Azəristiliktəchizat” Açıq tipli Səhmdar Cəmiyyəti yaradıldı. "Sumqayıtistiliktəchizat” idarəsi onun tərkibində fəaliyyətə başladı. Bundan sonra regionlarda və Sumqayıt şəhəri də daxil olmaqla istilik sahəsi tənəzzüldən inkişafa doğru getdi. 2005-ci ildən sonra müasir tipli modernləşdirilmiş qazanxanalar tikilməyə başladı. 4 mikrorayon, 6 məhəllə və Hacı Zeynalabdin qəsəbəsi də daxil olmaqla Sumqayıtda hal-hazırda 24 müasir istilik qazanxanası fəaliyyət göstərir. 215 yaşayış binası, 30 orta məktəb, 14 uşaq bağçası, 14 səhiyyə obyekti, 24 müəssisə və şirkətlərin inzibati binası istiliklə təmin edilir. 215 binada 1005 abonent var.

17-ci mikrorayonda bu il 3-cü yarımstansiya qazanxana tikilib başa çatdırılıb. "Azəriqaz” istehsalat birliyi tərəfindən qaz çəkilişi ilə bağlı qazanxanaya sənədləşmənin, yəni texniki şərtinin verilməməsi üzündən qazanxanada iş getmir. Sənədləşmə təsdiq edildikdən sonra qazanxanaya qaz çəkiləcək. 2015-ci ilin fevral, ya da mart ayında qazanxana işə düşəcək. Bununla da 17-ci mikrorayonun 59 yaşayış binası, 2 uşaq bağçası, 3 məktəb olmaqla istilik təchizatı başa çatacaq.

18-ci mikrorayonda isə hazırda 20 yaşayış binası, 2 uşaq bağçası və 2 məktəb istiliklə təmin olunub. 2-ci qazanxananın tikilməsi üçün 2007-ci ildə Sumqayıt şəhər icra başçısının sərəncamına müvafiq olaraq yer ayrılıb. Ola bilsin ki, 2015-ci ildə 18-ci mikrorayonun 2-ci qazanxanasının tikintisi də başa çatdırılsın.   

Xeberle.com