Qayınatasını qətlə yetirməkdə təqsirləndirilən Nurulla Mərdanovun cinayət işi üzrə məhkəmə prosesi yekunlaşıb.
Sumqayıt Ağır Cinayətlər Məhkəməsində keçirilən prosesdə təqsirləndirilən şəxsə hökm elan olunub.
Məhkəmənin qərarı ilə N.Mərdanov 16 il müddətinə azadlıqdan məhrum edilib.
İttiham materiallarına əsasən, 1998-ci il təvəllüdlü N.Mərdanov Sumqayıt şəhərindəki "İbiza" restoranında kababçı işləyib.
Gənc 2022-ci ildə ailə həyatı qurub və bu nikahdan bu övladı dünyaya gəlib. Ötən ilin iyun ayında Nurulla ilə həyat yoldaşı arasında qısqanclıq zəminində mübahisə baş verib.
N.Mərdanov həyat yoldaşını amansızlıqla döyərək ona xəsarət yetirib və evi tərk edib.
Hadisədən xəbər tutan N.Mərdanovun qayınatası vəziyyəti aydınlaşdırmaq məqsədilə onlara gəlsə də, Nurullanı evdə tapa bilməyib. O, kürəkəninə zəng vuraraq görüşüb danışmaq istədiyini bildirib.
Sumqayıtda küçədə baş tutan görüş zamanı qayınata ilə kürəkən arasında mübahisə baş verib və N.Mərdanov qayınatası Arif Bağıyevi bıçaqla qətlə yetirib.
Polis əməkdaşlarının həyata keçirdikləri əməliyyat nəticəsində N.Mərdanov saxlanılaraq istintaqa təhvil verilib.
Xəbərdən istifadə edərkən istinad etmək vacibdir.
