"İş tapa bilmirəm. Hara gedirəm məndən CV istəyirlər. Sonra da deyirlər ki, sizinlə əlaqə saxlayacağıq. Ancaq neçə aydır ki, bir dənə də olsun şirkət zəng eləməyib". 
İqtisadi Tədqiqatlar Mərkəzinin rəhbəri Azər Mehtiyev  problemin kökünə toxunub. Mütəxəssis bildirir ki, işsizliyi minimuma endirmək üçün ali təhsil sisteminin mövcud bazar sisteminə uyğunlaşdırılmasına ehtiyac var. İqtisadçının fikrincə, bəzən ali məktəblər tərəfindən bazarın tələblərin uyğun kadrlar buraxılmır və yaxud həmin kadrların bilik-bacarıqları yetərli səviyyədə olmur:
"Təbii ki, şirkətlərdə işçi götürərəkən onun bilik-bacarıqlarına diqqət yetirirlər. Təhsil sahəsində ciddi işlər görülməlidir ki, bu işsizlik problemi öz həllini tapsın. Hökumət səviyyəsində Təhsil və Məşğulluq Konsepsiyaları qəbul olunub, ancaq bu proqramlar nisbətən ləng tətbiq edilir. Bu isə müsbət nəticə əldə etmək üçün uzun müddət tələb olunur". 
A.Mehtiyev hesab edir ki, ölkədə çoxlu sayda daimi iş yerləri açılmalıdır. Ekspertin sözlərinə görə, bizdə daha çox ixtisas tələb olunmayan tikinti, yol çəkilişi və s. kimi sahələrdə iş yerləri açılır: "Bu cür iş yerləri isə insanların ehtiyaclarını tam qane etmir. İş yerlərinin artırılması üçün bazar sahibkarlıq mühitinin yaxşılaşdırılmasına ehtiyac var. Bununla yanaşı, davamlı olaraq insanlar üçün yeni ixtisas əldə etmək üçün sistem qurulmalıdır. Belə olarsa daha çox iş yerləri və müəssisələr yaradılacaq, həmçinin insanların işsizlik problemi kökündən həll olunacaq".
Əmək və Əhalinin Sosial Müdafiəsi Nazirliyindən isə bildirilir ki, nazirlik yanında Dövlət Məşğulluq Xidməti tərəfindən məşğulluq xidmətlərinin əhaliyə daha yaxın olması məqsədilə Bakı şəhərinin rayonlarında səyyar formada əmək birjaları təşkil olunur.
Nazirlikdən ANS PRESS-ə verilən məlumata görə, səyyar əmək birjası müvafiq texniki avadanlıqlarla təmin edilmiş nəqliyyat vasitəsilə təşkil edilir. Müəyyən olunmuş günlərdə paytaxtın ayrı-ayrı ərazilərində fəaliyyət göstərən səyyar əmək birjalarında müraciət edən yerli işaxtaran vətəndaşlar müəssisələrdəki boş (vakant) iş yerləri, habelə müvəqqəti xarakterli işlər barədə məlumatlarlandırılırlar. Vətəndaşlara işləmək istədikləri və əmək qabiliyyətlərinə uyğun boş iş yerlərinə yerindəcə göndərişlər verilir, lazımi hallarda onlar digər aktiv məşğulluq tədbirlərinə cəlb olunmaq üçün qeydiyyata alınırlar.
Bu ilin əvvəlindən Bakı şəhərinin müxtəlif yerlərində işsiz və işaxtaran vətəndaşlar üçün artıq 7 səyyar əmək birjası təşkil olunub və nəticədə 100 nəfərə yaxın artıq şəxsə boş iş yerlərinə göndərişlər verilib, 43 nəfər peşə hazırlığına cəlb edilmək üçün qeydiyyata götürülüb. Növbəti belə tədbir sabah, 27 fevral tarixində Binəqədi rayon ərazisində (7-ci m.rayon, S.S.Axundov küç. İnqilab kinoteatrının yaxınlığı) keçiriləcək. 
Səyyar əmək birjasında işaxtaran şəxslərə rayon məşğullluq mərkəzinin bazasında olan, fəhlə və qulluqçu peşələri üzrə 770-dən çox boş iş yeri təklif olunacaq. Nazirlikdən əmin edirlər ki, bu tədbirlərin mütəmadi olaraq bütün il boyu davam etdirilməsi nəzərdə tutulub.  (anspress.com)