Sumqayıt Texnologiyalar Parkında 2 aydır əmək haqqı verilmir?
Bu haqda dəfələrlə yazmışıq, amma görünür ki, yazılanların heç bir faydası olmayıb. Belə ki, Sumqayıt sakinlərinin az sayda qazanc yerlərindən olan və hər işsizin ümidlə işə düzəlmək arzusunda olduğu Sumqayıt Texnologiyalar Parkında geniş ixtisarlar aparılır.  Üstəlik, müəssisədə çalışan işçilər artıq mart ayı olmasına baxmayaraq yanvar ayının məvacibini ala bilməyiblər. 
STP-də çalışan və adının açıqlanmasını istəməyən işçilərdən birinin "Xeberle.com"-a verdiyi məlumata görə "Azərenerji”nin prezidenti Etibar Pirverdiyevin əlindən bəzi səlahiyyətlərin alınması vəziyyəti daha da gərginləşdirib: "Adını da qoyublar ən böyük müəssisə. Bilirsiniz, burada nə qədər ixtisarlar aparılır?! Bütün yaşlı işçilər işdən çıxarılır. Gündə ən azından 10 nəfəri çörək yerindən məhrum edirlər. Biz hələ yanvar ayının maaşını ala bilməmişik. Ümumiyyətlə, hər ay maaşla bağlı problemlər yaşanır. Bu necə rəhbərlikdir, işlərini normal şəkildə qura bilmir və zəhmətimizin haqqını ödəyə bilmir?! Vəzifəlilər istəsələr, maaşlarımızı vaxtında verə bilərlər. Amma kimdir qara camaatı fikirləşən?!  Qarşıdan 8 mart qadınlar bayramı gəlir. Xanımlarımızın yanında üzüqara olduq. Belə getsə, Novruz bayramında da xonçalarımız boş qalacaq. Hamının krediti var. Özü də "Ekspressbank"a. Bu bank elə özlərinin bankıdır. Dərdimizə isə əlac tapan yoxdur”  
Məsələ ilə bağlı Sumqayıt Texnologiyalar Parkının baş mühasibinin müavini Azər Şıxıyevlə əlaqə saxladıq. A.Şıxıyev "Xeberle.com"-a bildirdi ki, yanvar ayının maaşının verilməməsi ilə bağlı yayılan məlumatlar həqiqətəuyğun deyil: "Yalan məlumatdır, yanvar ayının maaşları verilib. Yaxın vaxtlarda isə fevral ayının məvacibləri ödəniləcək." 
Hesab edirik ki, bu kimi ixtisarlar, eləcə də insanların əmək haqqının verilməməsi sosial gərginlik yarada bilər və "qul bazarı"nın genişlənməyinə gətirib çıxara bilər.
Qeyd edək ki, STP-də elektroenergetika sənayesi üçün məhsullar hazırlanır, zavodlar, sexlər və istehsal xətləri yaradılır. Texnoparkın birinci mərhələsi çərçivəsində müəssisələrin tikinti-quraşdırma işlərində 2300 nəfərdən çox işçi çalışıb. Müəssisə tam işə düşdükdən sonra burada 3 min nəfər, o cümlədən yüksək ixtisaslı mühəndislərin daimi işlə təmin edilməsi qeyd olunur. 
Ruslan, Xeberle.com