Qız Qalasında muzey konservasiyası işləri 2009-cu ildə Nazirlər Kabineti təsdiq etdiyi plana uyğun olaraq, aparılıb. 2013-cü ilin oktyabr ayında Qız Qalasının həm fasadında, həm də daxilində bərpa və konservasiya işləri müvəffəqiyyətlə başa çatıb. Qalanın daxilində beynəlxalq standartlara cavab verən müasir muzey ekspozisiyasının yaradılıb. Bu il yanvarın 2-də muzey yerli və xarici qonaqların istifadəsinə verilib.

Paytaxtın qədim tarixinin əsas rəmzlərindən biri, milli memarlığımızın incisi, YUNESKO-nun Dünya İrsi Siyahısına daxil edilmiş Qız Qalası aparılan konservasiya işləri və yeni muzey ekspozisiyasının qurulmasından sonra qapılarını ziyarətçilər üçün açır. 2013-cü ilin yanvar ayında abidənin daxilində konservasiya işlərinə start verilməsi ilə əlaqədar Qala ziyarətçilər üçün bağlı elan olunub. Heydər Əliyev Fondunun dəstəyi ilə aparılan konservasiya işləri Avstriyanın məşhur bərpaçı mütəxəssisi, dünyanın müxtəlif yerlərində 400-dən artıq abidəni, o cümlədən İçəri Şəhərdə yerləşən Məhəmməd məscidini bərpa etmiş Erix Pummerin rəhbərliyi altında xarici və yerli mütəxəssislər tərəfindən həyata keçirilib.  

Qalanın birinci mərtəbəsində yerləşdirilən monitorlarda qalanın tarixi, daxili strukturu, tikilməsinin məqsədi və təyinatı ilə bağlı fərziyyələrlə, onu daimi əhatə edən əfsanələrdən bəhs edən videolar yerləşdirilib.

APA TV-nin xəbərinə görə, ekspozisiyadakı stenddə qədim sənətkarlıq məmulatları barədə məlumat verilir. Hər bir mərtəbədə ekspozisiyaya uyğun işıqlandırma sistemi quraşdırılıb. Burada Qız qalasının müdafiə, istehkam, dini, rəsədxana və digər təyinatı barədə fərziyyələrlə, elmi araşdırmalarla tanış olmaq mümkündür. Monitorlarda Qız qalasının təyinatı barədə film nümayiş etdirilir.

Qalanın dördüncü mərtəbəsində İçərişəhərin planı qurulub ki, burda da Azərbaycanda və dünya əhəmiyyətli 14 abidənin maketi quraşdırılıb. Hansı maketin üzərinə qırmızı işıq yanarsa, həmin abidə haqqında lövhədə məlumat əks olunur.

Qalada aparılan bərpa işlərindən sonra hər bir mərtəbədə ən müasir təhlükəsizlik, yanğından mühafizə sistemləri və digər müvafiq sistemlər quraşdırılıb. Muzey ekspozisiyasının “Bakının qəlbi” bölməsində geniş əksini tapıb.

Ekspozisiyanın növbəti bölməsində Qız qalasının müdafiə obyekti rolunu oynaması ilə bağlı fərziyyə və elmi araşdırmalardan bəhs edilir.

Bir stenddə qədim silah nümunələri nümayiş olunur. Monitorlarda İçərişəhərin hərbi tarixi və burada baş verən döyüşlər əksini tapıb. Qalada uşaqların böyük marağına səbəb olacaq “İçərişəhərin müdafiəsi” adlı interaktiv oyun da təqdim edilir.

Köhnə Bakını əks etdirən monitorda şəhərin iqtisadi, gündəlik həyatı, dini və şəhərsalma mövzularına geniş yer verilib.

Ekspozisiyada Qız qalasının qədim rəsədxana rolunu oynaması fərziyyəsinə də geniş yer ayrılıb.  Bəzi fikirlərə əsasən, Qız qalası əsas etibarilə Günəşin illik dövriyyəsini izləmək və bu prosesin önəmli məqamlarını öyrənmək məqsədilə ucaldılıb.

Bayram tətili olduğundan qalada sıxlıq hiss olunurdu. Bələdçi deyir ki, ziyarətçi qəbul eləməyə başlayandan 2 saat sonra artıq 230-dan çox insan gəlib.

Qonaqlar konservasiya işlərindən sonra qaladakı yenilikləri təəccüblə izləyirdilər.

Qız qalasının üstüinsanların rahatlığını və təhlükəsizliyini təmin etmək şərti ilə yenidən qurulub.