Sumqayıt Gənclər Evində Azərbaycan Respublikası Elm və Təhsil Nazirliyi Təhsildə İnkişaf və İnnovasiyalar üzrə VI qrant müsabiqəsində qalib elan olunan "Şagird Diksiya klubu” layihəsinin təqdimat mərasimi keçirilmişdir. Qeyd edək ki, layihə Nazirliyin maliyyə, Sumqayıt şəhər Gənclər və İdman Baş İdarəsi və Abşeron-Xızı Regional Təhsil İdarəsinin təşkilati dəstəyi ilə icra olunur.
Tədbirdə dövlət himni səsləndirilmiş, şəhidlərimizin əziz xatirəsi bir dəqiqəlik sükutla yad edilmişdir.
Daha sonra çıxış edən layihə rəhbəri Nigar Vəliyeva ölkəmizdə gənclərə göstərilən diqqət və qayğıdan, layihənin əhəmiyyətindən, məqsəd və vəzifələrindən danışmışdır.
Tədbirdə 35 saylı tam orta məktəbin direktoru Nüşabə Həsənova, Sumqayıt şəhər Gənclər və İdman Baş İdarəsinin Gənclərlə iş sektoru üzrə baş məsləhətçisi Həsən Həsənli, Əməkdar artist Ələkbər Əliyev və digərləri layihənin gedişatına uğurlar arzulamış, bu cür layihələrin şagirdlərin nitq qabiliyyətinin inkişafına əhəmiyyətli təsir edəcəyini qeyd etmişlər.
Qeyd edək ki, 4 ay müddətində davam edəcək layihədə 12-17 yaş arası 100 şagirdin iştirak edəcəyi, natiqlik bacarığı mövzusunda interaktiv seminar və praktik məşğələlərin keçirilməsi nəzərdə tutulur.
Xəbərdən istifadə edərkən istinad etmək vacibdir.
