Sumqayıt Regional Mədəniyyət İdarəsinə tabe olan Abşeron rayon Xırdalan Şəhər Heydər Əliyev Mərkəzində Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə "Şəhid Analarına Dəstək" İctimai Birliyinin "Şəhid ailələri və qazilərin hüquqi təminatı" layihəsi çərçivəsində maarifləndirmə tədbiri keçirilib.
Tədbirdə şəhid ailələri, müharibə iştirakçıları və ictimaiyyət nümayəndələri iştirak edib. Yığıncağı giriş sözü ilə açan "Şəhid Ailələrinə Dəstək" İctimai Birliyinin sədri şəhid anası Ceyran Həsənova gələn qonaqları salamlayaraq, tədbirə başlamazdan öncə Azərbaycan Respublikasının ərazi bütövlüyü uğrunda canlarını fəda edən şəhidlərimizin əziz xatirəsini bir dəqiqəlik sükutla yad edib.
Ceyran xanım sonra Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə yardımı ilə "Şəhid Analarına Dəstək" İctimai Birliyinin "Şəhid Ailələri və Qazilərin hüquqi təminatı" layihəsi çərçivəsində maarifləndirmə tədbirinin keçirilməsinin əhəmiyyətindən danışaraq qeyd edib ki, bu gün də ölkənin həssas qurumları olan şəhid ailələri və müharibə iştirakçılarımızın hüquqlarının müdafiəsi üçün hüquqi təminatın olması zəruri prosesdir.
Abşeron Rayon İcra Hakimiyyətinin İctimai-siyasi və humanitar məsələlər şöbəsinin baş məsləhətçisi Xanım İmanova çıxışında Abşeron rayonunda Şəhid ailələri və müharibə iştirakçılarına həssas yanaşıldığını, onlarla tez-tez görüşüb qayğı və problemlərinin tez bir zamanda həllinə nail olmaq üçün səy göstərdiklərini vurğulayıb.
Layihənin eksperti, hüquqşünas, Qarabağ müharibəsinin iştirakçısı Vüqar Dadaşov qanunvericilikdə həssas qurumlarla bağlı yeni qanun layihəsinin hazırlanmasına ehtiyac olduğunu qeyd edib və əlavə edib ki bu fikir ölkə başçısı cənab İlham Əliyevin şəhid ailələri və müharibə iştirakçılarına xüsusi qayğı və diqqətinin olmasından irəli gəlir.
Sonra illərlə yuxarıda adları qeyd olunan həssas qurumların yanında olub, onlara mənəvi dəstəyini əsirgəməyən, şəhidlərin tanıtımı məqsədilə onlarla sənədli filmlər müəllifi Gün Tv-nin təsisçi və direktoru Mehriban Sadıqova çıxış edərək, birinci və ikinci Qarabağ müharibəsi anlayışının səhv olduğunu və Qarabağ müharibəsi başlandıqdan bu günədək şəhidlərimizin olduğunu qeyd edərək, bu ifadənin yalnış olduğunu bildirib. Xanım jurnalist daha sonra şəhidlərimizin adlarınının əbədiləşdirilməsi ilə bağlı danışaraq bildirib ki, şəhidlərimizin adına küçə və məktəblərin verilməsi təkcə onların doğulub yaşadığı ərazi ilə məhdudlaşmamalı, bütün ölkə daxilini əhatə etməlidir.
Vətən müharibəsi iştirakçısı, ehtiyatda olan kapitan Taleh Əliyev çıxış edərək, şəhid ailələri və müharibə iştirakçılarına diqqət və qayğının artmasını işğaldan azad olunan ərazilərimizə qayıdışdan sonra daha da möhkəmləndiriləcəyindən bəhs edib.
Müzakirəyə çıxarılan məsələlərlə bağlı əslən Füzuli rayonundan olan şəhid Əlizadə Qurbaninin anası Gülarə xanım, şəhid Cəbrayıl Dövlətzadənin anası Məleykə xanım, şəhid İlqar Bürcəliyevin anası Elnurə xanım, Qarabağ veteranı Baba Qeyrətdənov, şəhid Arif Allahverdiyevin bacısı Sevinc Allahverdiyeva, şəhid İsmayıl Qasımovun anası Mahirə xanım, şəhid Anar Cavadovun bacısı Aynura xanım, şəhid Əsəd Həsənovun anası Məleykə Əsədova müzakirələrə qoşularaq, hüquqi və psixoloji təminatlarla bağlı belə müzakirələrin tez-tez keçirilməsinin vacibləyindən danışıblar.
Rəsmi hissədən sonra müzakirələr çay süfrəsi arxasında da davam etdirilib.
Xəbərdən istifadə edərkən istinad etmək vacibdir.
