Qubadlı Rayon İcra Hakimiyyətinin təşkilatçılığı ilə oktyabrın 25-də Sumqayıt şəhər Şəhidlər xiyabanında Qubadlı rayonunun işğaldan azad olunması və Vətən müharibəsində torpaqlarımızın azadlığı uğrunda gedən döyüşlərdə qəhrəmancasına şəhid olmuş İsgəndərov İlkin Camal oğlunun anım mərasimi keçirilib. Tədbirdə Qubadlı Rayon İcra Hakimiyyətinin başçısı Malik İsaqov, hüquq-mühafizə orqanları, icra hakimiyyətinin məsul şəxsləri, idarə, müəssisə, təşkilat rəhbərləri, şəhidlərimizin yaxınları, ailə üzvləri və ictimaiyyət nümayəndələri iştirak ediriblər.
AZƏRTAC xəbər verir ki, tədbir iştirakçıları əvvəlcə torpaqlarımızın bütövlüyü uğrunda canlarından keçmiş Vətən oğullarının xatirəsini bir dəqiqəlik sükutla yad ediv, şəhidlərimizin məzarları üzərinə əklillər və gül dəstələri qoyublar. Şəhidlərimizin ruhuna dualar oxunub.
Sumqayıt Regional Mədəniyyət İdarəsinin Qubadlı rayon nümayəndəliyinin kollektivi və Qubadlı rayon məktəblilərinin ifasında vətənpərvərlik mövzusunda və şəhidlərimizə həsr olunmuş şeirlər səsləndirilib.
Anım mərasimində bildirilib ki, Azərbaycan Respublikasının suverenliyi və ərazi bütövlüyü uğrunda gedən mübarizədə qəhrəmanlıq göstərən əsgər və zabitlərimiz, arxa cəbhədə çalışan mülki şəxslər, bütövlükdə xalqımız əzm və iradə, bir yumruq kimi birlik və həmrəylik nümayiş etdirdilər. Prezident İlham Əliyev hərbi sahədə olduğu kimi, diplomatik və informasiya savaşı cəbhəsində də misilsiz rəşadət göstərmişdir. 44 günlük müharibədə ordumuzun qəhrəmanlığı, Ali Baş Komandanın qətiyyəti ermənilərin və havadarlarının bölgədəki siyasətinin iflası ilə nəticələndi. Bütün təzyiqlərə, təhdidlərə baxmayaraq Azərbaycan Qələbə qazandı və tarixi ədalət bərpa olundu.
Ali Baş Komandan, Prezident İlham Əliyevin rəhbərliyi altında Müzəffər Ordumuzun igidliyi, qəhrəmanlığı sayəsində torpaqlarımız, həmçinin 30 ilə yaxın həsrətində olduğumuz Qubadlı rayonu işğaldan azad olundu. İkinci Qarabağ müharibəsində rayonun sakinlərindən 300-ə yaxını müharibədə könüllü iştirak edib. 44 günlük Vətən müharibəsində Qubadlı rayonundan 11 şəhid və 40-dan çox qazi öz adlarını tarixə yazdılar. Şəhidlərimizin qisası alındı, qanları yerdə qalmadı. Qubadlıdan olan hərbiçilər Prezident İlham Əliyevin sərəncamları ilə 200-dən çox müxtəlif orden və medallarla təltif olunublar.
Qeyd olunub ki, Qubadlı şəhərinin azad edildiyi gün – oktyabrın 25-də şəhidlik zirvəsinə ucalmış Qubadlı şəhər sakini İsgəndərov İlkin Camal oğlu 1999-cu il martın 18-də Sumqayıt şəhərində anadan olub. 2016-cı ildə Qubadlı rayon Kavdadıq kənd tam orta məktəbini bitirib. 2018-2019-cu illərdə Gəncə şəhərində yerləşən N saylı hərbi hissədə həqiqi hərbi xidmət keçib. Vətən müharibəsi başlayanda könüllü olaraq döyüşlərə qatılıb. Füzuli və Cəbrayıl rayonlarında gedən döyüşlərdə fəal iştirak edib və ona çavuş hərbi rütbəsi verilib. O, Sumqayıt şəhər Şəhidlər xiyabanında dəfn olunub.
"Vətən uğrunda” və "Füzulinin azad olunmasına görə" medalları ilə təltif edilib. Subay idi.
Şəhidimizin atası Camal İsgəndərov göstərdikləri diqqət və qayğıya görə Ali Baş Komandan, Prezident İlham Əliyevə, Birinci vitse-prezident Mehriban xanım Əliyevaya şəhid ailələri adından minnətdarlığını bildirib.
Xəbərdən istifadə edərkən istinad etmək vacibdir.
