Sumqayıt Regional Mədəniyyət İdarəsinə tabeli Qubadlı Rayon Nümayəndəliyi tərəfindən Qubadlı rayonunun Erməni təcavüzündən azad olunması və 44 günlük Vətən müharibəsinin şəhidi İlkin Camal oğlu İsgəndərovun anım günü ilə əlaqədar Sumqayıt şəhər Şəhidlər Xiyabanında tədbir keçirilib.
Xeberle.com xəbər verir ki, tədbirdə Qubadlı Rayon İcra Hakimiyyətinin başçısı cənab Malik İsaqov və digər məsul işçilər, idarə və təşkilat rəhbərləri, şəhid ailələri, rayon ictimaiyyəti işirak ediblər. Öncə Şəhidlər xiyabanında dəfn olunan bütün şəhidlərimizin məzarı ziyarət olunub, tər qərənfillər düzülüb. Vətənimizin azadlığı uğrunda canlarından keçən bütün şəhidlərin əziz xatirəsi bir dəqiqəlik sükutla yad olunub. Aparıcı rayon ictimaiyyətini Qubadlı rayonunun işğaldan azad edilməsi münasibətilə təbrik edib. Qeyd olunub ki, cənab Prezident Ali Baş Komandan İlham Əliyevin Sərəncamı ilə 15209 nəfər hərbçi "Qubadlının azad olunmasına görə" medalı ilə təltif olunub, bunlardan 100 nəfər Qubadlı rayon sakinidir. Qubadlının azad olunduğu gün qəhrəmancasına şəhid olan İlkin Camal oğlu İsgəndərovun da şərəfli həyat yolu haqqında danışılıb. Birinci Qarabağ müharibəsində şəhid olan Mübariz Nüsrət oğlu İsgəndərov İlkin İsgəndərovun əmisidir. O, öz əmisinin yolunu davam etdirərək qəhrəmancasına şəhadətə yüksəlib.
Sonra Vasili Əliyev adına Rayon Mədəniyyət evi və Mahmudlu kənd Mədəniyyət evinin əməkdaşlarının hazırladığı kompozisiya, şeirlər söylənilib. Sonda şəhidin atası Camal İsgəndərov göstərilən diqqət və qayğıya görə Ali Baş Komandan cənab İlham Əliyevə və rayon rəhbərliyinə öz təşəkkürünü bildirib.
Xəbərdən istifadə edərkən istinad etmək vacibdir.
