Sumqayıt Regional Mədəniyyət İdarəsinə tabeli Nizami Gəncəvi adına Kitabxana klubun əməkdaşları Vətən müharibəsi qazisi Əli Rövşən oğlu İbrahimovun ailəsini ziyarət edərək, ailənin qayğıları ilə maraqlanıb, maddi və mənəvi dəstək olublar. Əli İbrahimov 16 avqust 2001-ci ildə Sumqayıt şəhərində anadan olub. Müharibə başlayanda Tərtər, Ağdərə istiqamətində gedən döyüşlərdə şərəfli döyüş yolu keçib. Cəsur savaşçı Tərtər döyüşlərində yaralanmasına baxmayaraq könüllü olaraq Ağdərə döyüşlərinə qatılıb. Azərbaycanın ərazi bütövlüyünün təmin edilməsi uğrunda igidlik və şücaət nümayiş etdirdiyinə görə Azərbaycan Respublikasının Prezidenti cənab İlham Əliyevin Sərəncamına əsasən Əli İbrahimov "Suqovuşanın azad olunmasına görə”, "Döyüşdə fərqlənməyə görə” və "Cəsur döyüşçü” medalları ilə təltif edilib. Görüş zamanı qazimiz kitabxana kollektivinə 44 günlük Vətən Müharibəsi dövründə keçdiyi şərəfli döyüş yolundan söz açıb. Birinci Qarabağ müharibəsi qazisi olan Əlinin atası ölkə rəhbərliyinə dövlət tərəfindən onlara göstərilən diqqət və qayğıya görə təşəkkür edib. Sonda xatirə şəkilləri çəkilib.
Xəbərdən istifadə edərkən istinad etmək vacibdir.
