Azərbaycanın ərazi bütövlüyü uğrunda şəhid olmuş Elnur Allahverdizadənin anım günü keçirilib.
Xeberle.com xəbər verir ki, şəhidin anım günü Sumqayıt Şəhidlər Xiyabanında məzarı başında qeyd olunub. Anım mərasimində
Milli Məclisin deputatı Müşfqi Məmmədli, Bakı Slavyan Universitetinin rektoru Anar Nağıyev, şəhidin ailə üzvləri və dostları iştirak edib. Şəhidin ildönümü ilə əlaqədar keçirilən tədbirdə onun həyat yoluna nəzər salınıb.
Qeyd edək ki, Elnur Allahverdizadə 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan Vətən müharibəsində könüllü topçu olaraq iştirak etmişdir. Ağdamın və Xocavəndin azadlığı uğrunda gedən döyüşlərdə vuruşmuşdur.
Elnur Allahverdizadə 7 noyabr 2020-ci ildə Ağcabədi rayonunun Yuxarı Qiyaməddinli kəndi istiqamətində döyüş tapşırığının yerinə yetirilməsi zamanı həlak olmuşdur. 8 noyabr 2020-ci ildə Sumqayıt Şəhidlər Xiyabanında dəfn olunmuşdur.
Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin Sərəncamlarına əsasən Elnur Allahverdizadə ölümündən sonra "Vətən uğrunda", "Cəsur döyüşçü" və "Xocavəndin azad olunmasına görə" medalı ilə təltif edilib.
Xəbərdən istifadə edərkən istinad etmək vacibdir.
