Xalqımızın ən əziz bayramı olan Novruz, xüsusilə də İlaxır çərşənbə qubadlılılar tərəfindən hər il yüksək səviyyədə, təntənəli mərasimlərlə qeyd edilir.
Ənənəvi olaraq bu il də bayram ərəfəsində məcburi köçkünlərdən olan 780 aztəminatlı, imkansız ailəyə, o cümlədən şəhid ailələrinə Qubadlı Rayon İcra Hakimiyyəti tərəfindən bayram sovqatları paylanılıb.
Sumqayıtda köçkünlərin yığcam məskunlaşdığı ərazilərdə, o cümlədən şəhərin 42-ci məhəlləsində bayram şənliyi təşkil olunub.
Tonqal ətrafında məcburi köçkünlərlə görüşən rayon İcra hakimiyyətinin başçısı Malik İsaqov bayram münasibətilə təbriklərini çatdırıb. Qeyd olunub ki, Novruz ümumxalq bayramı kimi uzun əsrlərdən bəri yurdumuzun hər bir guşəsində müxtəlif el şənlikləri və mərasimlərlə qarşılanır. Ulu Tanrıya, kainatın nizamına və ana təbiətə sonsuz sevginin parlaq ifadəsi olan bu bayramın qədim ənənələrinin bütün rəngarəngliyi ilə qorunub saxlanılması Azərbaycan xalqının öz tarixi-mədəni keçmişinə yüksək ehtiramını və milli-mənəvi dəyərlərə dərin bağlılığını nümayiş etdirir.
Rayon İcra hakimiyyətinin başçısı vurğuladı ki, Qubadlı camaatı ümummilli lider Heydər Əliyevin siyasətinə daim sadiqdirlər və onun layiqli davamçısı Prezident İlham Əliyevi hər zaman dəstəkləyirlər.
Əminliklə bildirildi ki, dövlətimizin başçısının apardığı siyasət nəticəsində torpaqlarımız işğaldan tezliklə azad ediləcək və belə çərşənbə tonqalları hər kəsin öz yurdunda, öz həyətində alovlanacaq.
Rayonun Bərgüşad ansamblının, incəsənət xadimlərinin ifalarında hazırlanmış konsert proqramı, Novruzun simvolu olan Kosa və Keçəlin əyləncəli hərəkətləri, xalq rəqsləri şənliyə xüsusi rövnəq qatdı.  (azertag.az)