Kommunal məsələlər üzrə ekspert Elçin Bayramlı Xeberle.com-a bildirib ki, indiyədək dəm qazı ilə bağlı məsələlərlə SOCAR "Azəriqaz” İB məşğul olmurdu, lakin bu ildən AR Nazirlər Kabinetinin qərarı ilə artıq "Azəriqaz” İB əməkdaşları mənzillərdə də qaz borularına  və quraşdırılan məişət cihazlarına birbaşa nəzarət edə biləcək. 

Elçin Bayramlı həmçinin dəm qazı zəhərlənmələrinin artması məsələsini  əhalinin bu sahədə yetəri qədər məlumatının olmamamsı ilə əlaqələndirib:

 "Demək olar ki, bununla bağlı maarifləndirici tədbirlər həyata keçirilmir. Əksər hallarda günahı qaz sobalarında, xüsusilə də İrandan istehsallı sobalarda görürlər. Əslində həmin sobalar standartlara uyğundur. Sadəcə, ölkənin bəzi bölgələrində qaz təzyiqi aşağı olur. Bu sobalarda da qaz yaxşı yanmadığından, əlavə müdaxilə olunur və nəticədə standartdan kənara çıxılır, qaz axını baş verir. Hamamlarda isə su qızdırıcılarında böyük problem var. Qaz cihazı saz və standartlara uyğun olmalıdır. Cihaz olan məkanın hündürlüyü 2 metr 20 santimetrdən az olmamalıdır. Ümumiyyətlə, evdə havaçəkən sistem işləməlidir, nəfəslik isə açıq vəziyyətdə olmalıdır. Hamam otağına isə ventilyasiya borusu yerləşdirilməlidir. Qapının aşağı hissəsindən  bir neçə yerdən dəliklər açılmalıdır ki, dəm qazı təhlükəsi yaranarsa, o hava dəliklərdən çıxa bilsin. Ən azı ildə iki dəfə tüstü bacaları təmizlənməlidir. Vətəndaşlar bir şeyi yadda saxlamalıdır ki, dəm qazı iysiz olur, hiss edilməyəcək dərəcədə təhlükəlidir. Zəhərlənmənin ilkin əlamətləri isə  bunlardır: baş ağrısı, baş gicəllənməsi, ürəkbulanma və halsızlıq. Dəm qazından zəhərlənmiş insanı dərhal təmiz havaya çıxarmaq lazımdır”, - deyə E.Bayramlı qeyd edib.