Qarabağ döyüşlərində qəhrəmanlıqla həlak olmuş Rəhilə Qarayevanın anım mərasimi keçirilib

Bakıda gənc vətənpərvər Leyla Həsənovanın təşəbbüsü, "Şəhid Ailələrinə Dəstək” İctimai Birliyinin dəstəyi ilə "Unutmadıq, unutmarıq, unudulmayacaq!” adlı tədbir keçirilib. Dövlət Himninin səslənməsi ilə açıq elan edilən mərasimdə vətən uğrunda canlarını fəda etmiş şəhidlərin ruhu bir dəqiqəlik sükutla yad edilib. Anım tədbirinin təşkilatçısı Leyla Həsənova şəhid R. Qarayevanın həyat və döyüş yolundan söz açıb. L. Həsənova şəhidin uşaq yaşlarından vətənə bağlı olduğunu diqqətə çatdırıb: "Elə bu xarakterinin diktəsiylə Rəhilə Qarayeva 1992-ci ildə vətənimizin bütövlüyünü qorumaq uğrunda gedən döyüşlərə qatılıb. Öncə tibb bacısı kimi döyüşçü həmvətənlərinə qayğı göstərən el qızı sonradan döyüş mövqelərində görünməyə başlayıb.”

Döyüşçü xanımın  şücaətindən danışan tədbirin təşkilatçısı  R. Qarayevanın  ömrünün 23-cü baharında şəhidlik zirvəsinə ucaldığını vurğulayıb: "O, Həsən Qorxmazın baçşılıq etdiyi bölüyün tərkibində cəbhə xəttində çox sınaqlardan çıxmağı bacarsa da, 1993-cü il iyulun 31-də Qubadlı uğrunda gedən mübarizədə döyüşçü dağlar qızı ömrünün 23-cü baharında şəhidlik zirvəsinə ucaldı.”

Sonra Milli Qəhrəman Asif Məhərrəmovun adını daşıyan fondun rəhbəri, şəhidin qardaşı Ədalət Məhərrəmov,  Bakı şəhəri Qaradağ rayon Polis İdarəsinin əməkdaşı, polis mayoru Aida Şirinova, kapitan Gülarə Mürsəliyeva, sağlamlıqlarını vətənə qurban vermiş keçmiş döyüşçü xanımlar Sevda Səfərova, şəhid bacısı Nərminə Abbasquliyeva, Təranə Mursaqulova, Cəvahir Abdullayeva, Qarabağ qazisi Rəhman Cəfərov çıxış ediblər.

Tarixçi Nazim Tapdıqoğlu, Qarabağ Azadlıq Təşkilatının (QAT) təmsilçisi Tahir Bayramov, Bilik Fondunun əməkdaşı  Səlim Mirqafarov, "Avropa” Nəşriyyat Evinin rəhbəri Şöhrət Səlimbəyli, "Qürur” Şəhid Ailələri Birliyinin sədri Naibə Behbudova, Əlillər Cəmiyyətinin nümayəndəsi Salman Xudaverdiyev və jurnalist Nigar Həmidli  isə Qarabağ  uğrunda gedən mübarizədə şahidi olduqları hadisələrdən danışıblar.

Daha sonra İbrahim İbrahimov və Mələk Müzəffərova şəhidin xatirəsinə həsr olunmuş  şeirlər söyləyiblər. Milli Konservatoriyanın tələbələri "Qarabağ şikəstə"sini ifa ediblər.  

Sonda  tədbirin təşəbbüskarı  L. Həsənova  "Şəhid Ailələrinə Dəstək İctimai Birliyi” tərəfindən diplomla mükafatlandırılıb. Diqqətə görə öz təşəkkürünü bildirən L. Həsənova Tovuz Rayon İcra Hakimiyyətindən Tovuzun ilk şəhidi Rəhilə Qarayevanın xatirəsinin  əbədiləşdirilməsini xahiş edib.

Xeberle.com