"Siqnal" İxtisaslaşdırılmış Layihə-İstehsalat İdarəsi: "Hava şəraiti ilə əlaqəli yenilənmə işləri apara bilmirik, yağışlı havalardan sonra şəhər üzrə bütün piyada zolaqları yenilənəcək."
Sumqayıt şəhərində yollarda sürücü və piyadaların narahatlığına səbəb olan hallardan biri də prospekt və küçələrə çəkilən nişan-xətlərin, piyada zolaqlarının tez bir zamanda silinməsidir.
Son zamanlar piyadaların ölümü ilə nəticələnən qəzaların artmasında rol oynayan əsas səbəblərdən biri də piyada zolaqlarının silinməsi və yox vəziyyətində olmasıdır. Xətlərin silinməsi insanların həyatını təhlükəyə atmaqla yanaşı, sürücülərin də tez-tez qayda pozuntusu etməsinə və cərimələnməsinə səbəb olur.
Bu məsələyə hansı dövlət qurumu nəzarət edir? Piyada zolaqları, eləcə də yollardakı digər zolaqlar nə qədər müddətə yenilənir?
Yollardakı müvafiq vəziyyət vaxtaşırı monitorinq edilirmi?
"Siqnal” İxtisaslaşdırılmış Layihə-İstehsalat İdarəsindən Xeberle.com-un sorğusuna cavab olaraq bildirilib ki, vaxtaşırı şəhərin küçələrinə nəzarət edilir və son vaxtlar havaların yağışlı keçməsi səbəbindən silinən zolaqlar yenilənməyib: "Ümumi olaraq 6 aydan bir monitorinqlər keçirilir və silinən zolaqlar yenilənir. Həmin rənglər isə, sırf yol üçün hazırlanır. Lakin onları biz hazırlamırıq. Biz hazır şəkildə onu alıb, istifadə edirik".
Yeni zolaqların çəkilməsi məsələsinə gəldikdə isə idarədən bu məsələnin onların səlahiyyətləri çərçivəsində olmadığı qeyd olunub: "Yeni asfaltlanan yollara və ya ümumiyyətlə piyada keçidi olmayan ərazilərdə isə zolaqların çəkilməsi üçün vətəndaşlar Daxili İşlər Nazirliyi Baş Yol Polis İdarəsinin Yol Hərəkəti Təhlükəsizliyi İdarəsinə yazılı şəkildə məktubla müraciət etməlidirlər.
Müraciət əsasında əraziyə piyada zolaqları çəkilməsinə icazə verildikdən sonra bizim idarə həmin hissələrdə piyada zolaqları çəkəcək".
Xədicə Səxavətqızı
Xeberle.com
Xəbərdən istifadə edərkən istinad etmək vacibdir.
