Rusiya sülhməramlı kontingentinin Qarabağdakı yeni komandanı, general Aleksandr Lentsov danışıqlar üçün Bakıya gəlib.
Xeberle.com xəbər verir ki, bu barədə Xankəndidəki separatçı rejimin "Antiböhran Şurasının” sədri Tiqran Petrosyan öz Facebook səhifəsində bildirib.
Onun sözlərinə görə, Xankəndidəki separatçı rejimin rəhbərliyi Rusiya sülhməramlı kontingentinin komandiri Aleksandr Lentsovla danışıb və o, danışıqlar üçün Bakıya getdiyini bildirib.
Onun dediyinə görə, Lentsov Bakıya son yaranmış durumu, Laçın dəhlizindəki nəzarət-buraxılış məntəqəsi ilə bağlı məsələni müzakirə etmək üçün gəlib.
"Ruslar azərbaycanlılarla danışıqlar apardıqlarını əsas gətirərək çərşənbə gününə qədər gözləməyə çağırırlar. Onlar vaxtı uzatmağa çalışırlar”, - o qeyd edib.
Tiqran Petrosyan erməniləri meydana çıxmağa çağırıb və Rusiya tərəfinə tələb irəli sürüb.
"Əgər ruslar desələr ki, bunu etmirlər və ya bacarmırlar, biz deyəcəyik, o zaman BMT-yə müraciət edəcəyik. Əgər BMT cavab verməsə və biz bütün dünyanın erməni xalqından üz döndərdiyini başa düşsək, biz özümüz nəticə çıxarıb addımlar atacağıq”, - deyə o əlavə edib.
Xəbərdən istifadə edərkən istinad etmək vacibdir.
