Dünən İtaliyanın Milan şəhərində etirazçılarla polis arasında şiddətli toqquşma baş verib, şəhər az qala döyüş meydanına çevrilib. Polis qüvvələri etirazçılara qarşı gözyaşardıcı qazdan istifadə edib.

"Milan Expo 2015" beynəlxalq sərgisinə etiraz məqsədilə təşkil edilən nümayişlər sonradan zorakı iğtişaşlara çevrilib. 

Məlumata görə, aksiyalar Baş nazir Matteo Renzinin sərgini açıq elan etməsindən sonra başlanıb. Sərginin keçirildiyi ərazidə minlərlə polis qüvvəsi cəlb olunub. Etirazçılar sol sektor tərəfdarları, anti-qlobalist və ekologiya fəallarından ibarət tələbələr və sərt qənaət planına qarşı çıxan vətəndaşlardan ibarət olub. Onlar bu sərginin israf və korrupsiya mənbəyi olduğunu bildiriblər.

Bildirək ki, indiyədək sərgidə iştirak üçün 10 milyondan çox bilet satılıb və sərgidə 20 milyon insanın iştirak edəcəyi gözlənilir. İtaliya hökuməti bu yolla 10 milyard avro vəsait qazanacağını təxmin edir. (interaztv.com)