Türkiyənin Kazan şəhərində keçirilən XVI BRICS Sammitinin "Outreach”/"BRICS+” formatının ilk plenar iclasında yüksək səviyyədə təmsil olunması NATO daxilində müzakirələrə səbəb olub. NATO-nun Baş katibi Mark Rutte Estoniyaya səfəri zamanı Türkiyənin BRICS-ə yaxınlaşmasından danışıb.
"NATO 32 demokratik dövlətdən ibarətdir. Təbii ki, həmişə bu və ya digər mövzuda mübahisələr olacaq. Amma biz bilirik ki, Türkiyə öz tərəfdaşları və ya BRICS tərəfdaşları ilə işləyir, onların buna haqqı var. Amma bu, mübahisəyə səbəb ola bilər”,-o deyib.
Modern.az-a danışan türkiyəli təhlükəsizlik eksperti İmbat Muğlu bildirib ki, Türkiyənin BRICS-ə yaxınlaşması onun NATO üzvlüyü məsələsini riskə ata bilər:
"Başda Braziliya, Rusiya, Çin və Hindistan kimi ölkələrin qurduğu təşkilat olduğu üçün ABŞ ona qarşıdır. ABŞ özündən güclü belə təşkilatları istəmir. NATO-nu idarə edən də məhz ABŞ-dir. Biz NATO üzvü olsaq da, qurum ABŞ-nin təlimatları əsasında hərəkət edir. Cənab Rəcəb Tayyib Ərdoğan və cənab Putinin Türkiyənin NATO üzvlüyünün BRICS-ə üzv olmasına mane olmadığını düşünür. Həm can Azərbaycanla ortaq hərəkət etməsi, Qafqaz ölkələri, eləcə də Çin və Hindistan kimi dövlətlərlə ortaq hərəkət ediləcəyi düşüncəsi ilə məncə bu, Türkiyənin NATO üzvlüyünü riskə ata bilər. ABŞ yaxşı bilir ki, Türkiyə NATO-nun ordu olaraq, ikincidir. ABŞ Türkiyənin BRICS üzvlüyünə mütləq əngəl olacaq, bəhanələr tapacaqlar. Türkiyə bu məsələdə seçim edəcəkmi, edəcəksə BRICS-mi seçəcək? Bu məsələlər dövlət böyüklərimizin təşəbbüsündə olan məsələdir. Qanuni heç bir mane olmadığı halda məsələlərin gündəmə gəlməsi qəsdəndir. Ən böyük səbəb də təşkilatın içində Çinin, Rusiyanın olmasıdır. Bu ölkələr ABŞ-nin güc itirməsinə səbəb olur. Rusiya bu gün Ukraynadakı müharibəyə görə iqtisadi baxımdan zəifləsə də, onlar bilirlər ki, arxalarında Çin var. Bütün bunları bildiklərinə görə Türkiyənin bura daxil olmasına imkan vermək istəmirlər. Türkiyənin NATO üzvlüyü ilə bağlı problem yarada bilərlər".
İmbat Muğlu vurğulayıb ki, Türkiyə NATO-dan çıxsa da, nəsə itirməyəcək:
"Amma Türkiyə olmadan NATO buralarda nəfəs ala bilməz. Əgər NATO üzvü olan ölkənin BRICS-ə üzvlüyünü qadağan edən maddə hazırlasalar, onda Türkiyə seçimini özü edəcək. Bu günə qədər NATO-nun Türkiyəyə heç bir xeyri olmayıb. Əksinə Türkiyə NATO-ya əsgər yollayıb, maddi ödəniş edib. Koreyadan tutmuş bir çox ölkələrdəki müharibələrdə Türkiyə NATO-ya dəstək verib. Amma 40 ildir biz terrorla mübarizə aparırıq, NATO ölkələri düşmənlərimizə silah verməkdədirlər. Türkiyə NATO-dan çıxsa, nəsə itirəcəyini düşünmürəm".
Xəbərdən istifadə edərkən istinad etmək vacibdir.
