Çox az adam var ki, onun doğum günü dünyanın gündəmində olur. Amerikalı Seralin Tolli də belə şəxslərdəndir. 115 yaşında dünyanın ən yaşlı insanı adını qazanan bu qadın, öz rekordunu daha da möhkəmləndirib. Seralin Tolli  116-cı doğum gününü qeyd edib.

Dünyanin ən yaşlı insanının doğum günü mərasimi Miçiqan ştatının İnkster şəhərindəki kilsələrdən birində təşkil olunub. Ailə üzvlərinin, yaxınlarının iştirak etdiyi şənlik yerli medianın da diqqət mərkəzində  olub. 116 yaşlı qadının ad  günü üçün məhz kilsəni seçməsi heç də təsadüfi deyil.  Çünki Seralin Tolli bu qədər yaşamasının sirrini məhz Tanrıya inanıb, ona ibadət etməkdə görür.

Bu qadın 3 əsrdir ki yaşayır. 1899-ci ildə anadan olan Seralin, həmvətəni Certrud Viverin  116 yaşda vəfat etməsindən sonra, dünyanın ən yaşlı insanı ünvanına sahib olub. Bu qadın heç vaxt siqaret çəkməyib, spirtli içkiləri də yaxına buraxmayıb.  116 ildə sadəcə bir dəfə əməliyyat olunan Seralin, həmin əməliyyat zamanı boğazındakı vəzi kəsdirib.

104 yaşınadək sərbəst şəkildə hərəkət edən amerikalı, yalnız bundan sonra qocalığın ağır yükünü çiynində hiss etməyə başlayıb. İndi əsa  ilə gəzən dünyanın ən yaşlı insanı mümkün qədər kilsələrdə keçirilən ayinlərdə çox iştirak etməyə çalışır. Gəzməyi o qədər də sevməyən Seralin yalnız övladlarının evinə qonaq gedir.  (atv.az)