Bu gün  Ernest Müller Heminqueyin vəfat etdiyi gündür...

...1899-cu ilin 21 iyulu və 1961-ci ilin 2 iyulu... Bu zaman kəsiyi Ernest Müller Heminqueyin həyat rəqəmləridir. Və bu həyat rəqəmi sona yaxınlaşdıqca, sənətkar Heminquey ilə insan Heminquey arasındakı ziddiyyətlər özünü göstərməyə başlayır. İnsan Heminqueyin yaddaşının itməsi sənətkar üçün problemlər yaradır. Həkimlər müalicəyə başlayırlar. Şok terapiyası nəticəsində insan Heminquey yaddaşını təmamilə itirir. Bu isə artıq sənətkar Heminqueyin sonu demək idi. 1961-ci ilin ilk aylarından ruh düşkünlüyü və paranoya içərisində çabalayan insan Heminquey iyulun 2-də sübh tezdən tüfənginin lüləsini yaddaşsızlıq mərəzinə tutulmuş beyninə tuşlayır. Və sənətkar Heminquey insan Heminqueydən qisasını belə alır...

...O dünyanın ən çox görən və yaşayan sənətkarlarından idi. Çünki bəziləri yaşadıqlarını yazmaq, bəziləri yazdıqlarını yaşamaq xoşbəxtliyindən məhrumdurlar. Heminquey isə yaşadığını yazan xoşbəxt yazıçı və yazdığını yaşamış bədbəxt birisi idi...
(atv.az)