Dünyanın ən qapalı ölkəsi sayılan Şimali Koreyanın başı yenidən dərddədir. ANS PRESS-in məlumatına görə, BMT Təhlükəsizlik Şurası (TŞ) nüvə fəaliyyətinə davam etdiyi üçün bu ölkəyə qarşı yeni sanksiyalar tətbiq edib. Daha doğrusu, mövcud sanksiyalar daha da sərtləşdirilib. Qanun layihəsi səs çoxluğu ilə qəbul edilib.
Qərarı Türkiyənin də arasında olduğu 50-dən artıq ölkə dəstəkləyib. Qərara əsasən, Şimali Koreyaya gedən və bu ölkədən çıxan bütün yüklərin şübhəli maddə daşıması təhlükəsinə qarşı BMT üzvü olan ölkələrə bu yükləri yoxlama öhdəliyi verilib.
Bu ölkədən kömür və dəmir alınması qadağan edilib, qızıl, titan və bənzər yeraltı sərvətlərin alınmasına məhdudiyyət qoyulub. Bundan başqa Şimali Koreyaya raket yanacağı da daxil olmaqla hava nəqliyyatı yanacağı, bahalı saatlar kimi lüks məhsulların satışı da qadağan edilib, ölkələrdən qeyri-leqal fəaliyyəti olduğu üzə çıxan koreyalı diplomatları deportasiya etmələri istənilir.
Bu qanunda ölkənin banklarını hədəf alan iqtisadi sanksiyalar da yer alıb. Sanksiyaların sərtləşdirilməsinin ölkənin gəlirlərinə də mənfi təsir edəcəyi aydındır. Belə ki, ancaq kömür satışından ölkə ildə bir milyard dollar qazanırdı. Bütün gəlirlər isə demək olar ki, nüvə-raket proqramının maliyyələşdirilməsinə yönəldirilirdi.
