Xəbər verildiyi kimi, Hollandiyada fəaliyyət göstərən Azərbaycan Türk mədəniyyət mərkəzinin sədri İlhan Aşqına qarşı ermənilər qondarma ittihamla cinayət işi açdırıb.

2014-cü il Hollandiyada qondarma erməni soyqırımını yalanlayan mitinqdə İ.Aşqın Ermənistanın Azərbaycan torpaqlarını işğal etdiyini qeyri- şərtsiz torpaqları azad etməli olduqlarını tələb etmişdir. Bu çıxışında erməni vəhşiliyindən söhbət açaraq işğalda olan torpaqları azad etməyəcəkləri təqdirdə lazım olarsa, qan tökərək o yerləri qurtacaqlarını bəyan edib. Ermənilər də bunu əsas gətirərək İ.Aşqının həbsini tələb edirlər. İzmir Azərbaycan Kültür və Dayanışma Dərnəyi başqanı Mülazim Paşa İ.Aşqına dəstək verərək sona qədər onun yanında olduqlarını bəyan edib. O, Hollandiya məhkəməsində açılan bu cinayət işinin gülünc olduğunu irəli sürərək Avropa məhkəmələrinin dəfələrlə erməni oyunlarına aldandığını, sonradan bu səhvlərini düzəltsələr də tarixə saxta oyunların qurbanı olaraq keçdiklərini xatırladıb. "Erməni Türk məsələsində dünyanın, o cümlədən Avropanın ikili standartlardan yanaşdığını bilməyən yoxdur. Olmayan soyqırım yalanlarıyla hər fürsətdə türklərə qarşı bir sanksiya tətbiq etmək istəyirlər. Türkiyə höküməti dəfələrlə qondarma soyqırımın araşdırılması üçün arxivlərini açdığını, ama Ermənistanın bundan qaçdığını hamımız bilirik. Çünki arxivlər araşdırılarsa, ermənilərin etdiyi soyqırım ortaya çıxacaq. Bunu ermənilər də, onların havadarı Avropa da yaxşı bilir. Odur ki, İ.Aşqına qarşı edilən bu təzyiqə göz yummayacağıq. Heç bir əsas olmadan açılan cinayət işinə xitam verilməyənə qədər etirazımızı bildirəcəyik" deyən M.Paşa sona qədər İ.Aşqının yanında olduqlarını vurğuladı.