Yunanıstanın Lesbos adasında olan Moria qaçqın düşərgəsindəki şiddət nəticəsində vəziyyət ölümcül həddə çatıb, bəzi uşaqlar 10 yaşında intihara cəhd etdikləri bildirilib.

BBC-nin Victoria Derbyshire proqramı düşərgədən təəssüratlarını yazıb. Əfqanıstanlı Sara Xan deyir: "Uşaqlarımızı 24 saat ərzində hər an götürüb qaçmağa hazır vəziyyətdəyik". Sara bütün günü yemək ala bilmək üçün növbədə gözlədiklərini və gecələri də dava-dalaş olacaq deyə həyəcanda qaldığlarını deyir. Sərhədsiz Həkimlər (MSF) təşkilatının məlumatlarına görə, düşərgədəki bir ayaqyolundan təxminən 70 nəfər istifadə edir və hər yerdə təmizlənməmiş kanalizasiya qoxusu var.

Qeyd edək ki, düşərgədə bəziləri daşına bilən daxmalarda yaşayır və yaşamağa yeri olmayanlar isə çadırlarda gecələyir. Çadır evində 17 nəfər yaşayır: dörd ailə bir çadır örtüyü altından sağ qalmağa çalışır. Ölüm xəstəliklər, aclıq və səfalət içində yaşayan insanların hər an qapısının önündədir.