Sağlam həyat tərzinin əsas şərtlərindən biri idmanla məşğul olmaqdır. Milyonlarla insan kimi siyasi liderlərin bir çoxu idmanla məşğul olmaq üçün kabinetlərini qısa müddətə olsa da idman meydançaları ilə əvəzləməyə vaxt tapırlar. 
Bəs siyasi birincilər idmanın hansı növünə üstünlük verirlər? Modern.az saytı ayrı-ayrı mənbələrlə  bunu araşdırmağa çalışıb.

Azərbaycan Prezidenti İlham Əliyevin idmana olan böyük marağı mütəmadi olaraq kütləvi informasiya vasitələrində öz əksini tapır. İdmana olan şəxsi marağı ilə yanaşı, prezident İlham Əliyevin həyata keçirdiyi uğurlu idman siyasəti ölkəmizi dünya idmanının və Olimpiya hərəkatının ən fəal üzvlərindən birinə çevirib. Bu gün ölkəmizdə idmanın inkişafı, Azərbaycanın dünyada idman ölkəsi kimi tanınmasında dövlət başçısı İlham Əliyevin rolu danılmazdır. 
İlham Əliyev qışda dağ xizəkçiliyilə məşğul olur.

Rusiya Federasiyasının prezidenti Vladimir Putinin ən çox sevdiyi idman növü cüdodur. Pusiya prezidenti bu idman növü ilə 13 yaşından məşğul olur. İdman sahəsində Putinin nailiyyətləri də az deyil. Leninqrad çempionu olan prezident cüdo və sambo üzrə idman ustası, altıncı dərəcə “qara kəmər”in sahibidir. Vladimir Putin bu gün də idmanla ciddi məşğul olur.

Həmişə sağlam və gümrah görünən Belarus prezidenti Aleksandr Lukaşenkoidmanın daha çox xokkey və dağ xizəkçiliyi növünə üstünlük verir. Prezident müntəzəm olaraq Belarusun paytaxtı Minskdə idman sarayında məşqlər edir.

Amerika Birləşmiş Ştatlarının prezidenti Barak Obama iş rejimində idman üçün ayrılmış vaxta ciddi riayət edir. Prezident öz idman məşqlərinə xanımı Mişel Obamanı və iki qızını da cəlb edib. Obamanın ən çox sevdiyi idman növü basketboldur. Həftədə dörd dəfə idmanla məşğul olan Obama digər məmurlara da bunu tövsiyə edir.

Dünyanın ən kök əhalisinin Meksikada yaşadığı bəyan ediləndə Meksika prezidenti Enrike Penya Nyeto vəziyyətdən çıxış üçün yeni üsula əl atıb. Fitnes həvəskarı olan prezident meksikalıları hər gün bir saat idmanla məşğul olmağa çağırıb. Hətta Enrike Penya Nyeto şəhər ətrafında 10 kilometr qaşışı ilə yerli əhaliyə nümunə olmağa da qərar verib.

İdmanın bütün növlərinə maraq göstərən Rusiyanın baş naziri Dmitri Medvedevbadmintona daha çox üstünlük verir. Baş nazir arabir ölkəsinin prezidentini də “rinq”ə dəvət edir.

74 yaşlı Qazaxıstan prezidenti Nursultan Nazarbayev üçün idmanla məşğul olmaqda yaş məhdudiyyəti yoxdur. Sağlamlığına xüsusi diqqət yetirən prezident müntəzəm idmanla məşğul olur. Nazarbayev dağ-xizək idman növünə üstünlük verir.

Sağlam həyat tərzinə xüsusi önəm verən Böyük Britaniyanın baş naziri Devid Kemeron da həmkarları kimi müntəzəm idmanla məşğul olur. Baş nazir idmanın badminton və tennis növlərinə daha çox üstünlük verir. Devid Kemeron bu sahədəki məharətini Londonda iki günlük rəsmi səfərdə olan Barak Obamaya da nümayiş etdirib.

Almaniya kansleri Angela Merkelin idmanla məşğul olması siyasətçi xanıma baha başa gəlib. İsveçrədə xizəklə sürüşən zaman kansler yıxılaraq ciddi zədələr alıb. Bu hadisəyə görə kanslerin üç həftə ərzində tədbirləri və görüşləri təxirə salınıb. İdmanla məşğul olmağa çox da vaxt tapmayan Angela Merkel hədsiz dərəcədə futbol azarkeşidir.

“İdman hamı və hər kəs üçündür” ifadəsini tez-tez işlədən Türkmənistan prezidenti Qurbanqulu Berdiməhəmmədov idmana olan marağı ilə siyasi liderlərdən geri qalmır. İdmanın bir çox növləri ilə məşğul olan prezident məşqlərdən sonra bitki çayları içir. Qeyd edək ki, tibb elmləri doktoru olan Qurbanqulu Berdiməhəmmədov “Türkmənistanın dərman bitkiləri” kitabının müəllifidir. O, atçılıq idmanına xüsusi maraq göstərir.