Britaniya və Almaniya Suriyadakı heç bir hava hücumlarına qoşulmayacaqlarını bildiriblər. 

“Qafqazinfo” eunews.az-a istinadən xəbər verir ki, İŞİD-i İraq və Suriyadan çıxarmaq üçün onlar başqa yollar axtaracaqlar.

Almaniya və Britaniya xarici işlər nazirləri ölkələrinin Suriyadakı hava hücumlarında iştirak etməyəcəklərini bildiriblər. ABŞ prezidenti Barak Obama bu bəyanatdan 1 gün əvvəl İŞİD əleyhinə hücum kampaniyasını genişləndirəcəyini bildirmişdi. “Britaniya Suriyadakı hava hücumlarında iştirak etməyəcək”, - Berlində həmkarı Frank-Valter Ştaynmayerlə görüşdən sonra Britaniyanın xarici işlər naziri Filip Hemmond belə deyib. Xatırladaq ki, ötən il Britaniya parlamenti də hava hücumlarında iştirak etməməklə bağlı qərar çıxarmışdı.

Buna baxmayaraq, Filip Hemmond bildirib ki, “Britaniya ABŞ-ın planını və həmin plana necə töhfə verəcəyini” diqqətlə nəzərdən keçirəcək.

Almaniya artıq İŞİD ekstremistlərinə qarşı vuruşan kürdləri silahlandırır. Xarici işlər naziri Frank-Valter Ştaynmayer də hava hücumları ideyasından imtina edib: “Bizə buna qoşulmaq təklif olunmayıb, həmçinin qoşulmaq fikrimiz də yoxdur.”