Türkiyənin Van bölgəsində meydana gələn ikinci qar uçqununda Prezident Rəcəb Tayyib Ərdoğanın Baş müşaviri Gülşən Orhan da qar altında qalıb və yaralı vəziyyətdə xilas edilib.
Bu barədə "Hürriyyet” informasiya yayıb.
Yaralı vəziyyətdə xilas edilən Gülşən Orhan dərhal Çatan Dövlət Xəstəxanasına çatdırılıb.
Xatırladaq ki, Türkiyənin Van-Bahçesaray magistralında qar uçqunu baş verib. Təbiət hadisəsi nəqliyyatın hərəkətini iflic edib. Nəticədə, bir mikroavtobus və traktor uçqun altında qalıb.
Xilasetmə əməliyyatı nəticəsində qarın altından səkkiz nəfər xilas edilib, beş nəfərin cansız bədəni aşkarlanıb. Axtarışlar yerli vaxtda 01:00-da dayandırılıb və 07:00-da bərpa edilib. Qar altında qaldığı ehtimal olunan daha iki nəfərin axtarışları zamanı ərazidə ikinci dəfə qar uçqunu baş verib.
İlkin məlumatlara görə, ikinci uçqun zamanı ən azı səkkiz nəfər həyatını itirib. Qar altında qalan 30-dan çox insanın axtarışları davam edir.
Xəbərdən istifadə edərkən istinad etmək vacibdir.
