Rusiya Səhiyyə naziri Mixail Muraşko ölkə əhalisinin koronavirusa qarşı kütləvi peyvəndlənməsinin bir neçə aydan sonra mümkün olacağını açıqlayıb.
Xeberle.com "İnterfaks”a istinadən xəbər verir ki, Muraşko jurnalistlərə açıqlamasında "Peyvənd istehsalı üzərində üç şirkət işləyir, preparatların ilk seriyası artıq çıxıb. Noyabr-dekabr aylarının sonlarında böyük həcmdə tədarükə başlamağı planlaşdırırıq, bunlar bizə yalnız risk qruplarına çatmağımıza deyil, həm də daha kütləvi peyvəndlənməyə imkan verəcək”,-deyə qeyd edib.
Nazir kütləvi peyvəndlənmənin klinik tədqiqatlar və risk qruplarının peyvəndlənməsi ilə paralel gedəcəyini sözlərinə əlavə edib.
Hazırda bölgələrdə risk qruplarının peyvəndlənməsi ilə yanaşı təchizat zəncirinin inkişafı, peyvəndlə işləyəcək kadrların hazırlanması və böyük dozada peyvəndin sənaye istehsalı üçün işlər davam edir.
Qeyd edək ki, Rusiya avqustun 11-də dünyada ilk dəfə olaraq koronavirus vaksinini qeydiyyatdan keçirib. O, "Sputnik V” adını alıb.
Xəbərdən istifadə edərkən istinad etmək vacibdir.
