Yaltanı faşistlərdən azad edən zabitin şərəfinə.

Krımın azərbaycanlılar icması Yaltanın Cəlil Nəcəbov bağında ticarət və əyləncə mərkəzinin tikilməsinə qarşıdırlar.  

Bu barədə "Krım Media” informasiya agentliyinə icmanın rəhbəri Rəhim Hümbətov bildirib.

Onun sözlərinə görə, Yaltanı faşistlərdən azad edən zabitin xatirəsinə salınmış bağda tikinti işləri artıq başlayıb. Fəhlələr bağın bir hissəsini bağlayaraq guya ki, çayın axarını dəyişirlər:

"Biz Yaltada nadir bağlardan birinin məhv edilməsinə qarşıyıq. Ümumiyyətlə, bu bağı yaltalılar və turistlər üçün istirahət yerinə çevirməyi düşünürdük. Biz, burada Azərbaycan tarixi muzeyini yaratmaq, fəvvarələr tikmək istəyirdik”, - Hümbətov planları ilə bölüşüb.

Onun sözlərinə görə, azərbaycanlılar bura yetərincə vəsait qoyublar, çayın üzərindən keçən körpünü təmir edib, ikincisini isə tikiblər, yol çəkib, ərazini təmizləyiblər. Burada icmanın apardığı işlərə qədər olan vəziyyət "keçilməz cəngəlliklərə” bənzəyirdi.

"Buradan neçə maşın zibil çıxarmışıq, bir bilsəniz! İndi orada insanlar daha fəal istirahət edirlər, analar uşaqları ilə bərabər gəlir”, - icma rəhbəri vurğulayıb.

R.Hümbətov bildirib ki, Yalta hökuməti deyilənlərə görə, sərmayəçi ilə əlaqə quraraq tikintini dayandırmağı xahiş edib. Etiraz cavabı gələrsə azərbaycanlılar aksiya keçirərək problemə diqqət cəlb etmək niyyətindədirlər.

2013-cü ildə Krım azərbaycanlıları icması bağda Cəlil Nəcəbovun şərəfinə memorial lövhə quraşdırıblar. Zabit Yaltanı Hitler qoşunlarından azad edən 323-cü qvardiya atıcı alayının komandiri olub. Alay Yalta alayı adını alıb, Nəcəbov isə Yaltanın fəxri vətəndaşı olub.   (oxu.az)