Argentinada prezident Kristina Fernandesin İranla gizli sövdələşməsini üzə çıxaran və onun həbsini tələb edən xüsusi işlər üzrə prokuror Alberto Nisman evində ölü tapılıb.

Bazar günü gecə prokurorun meyiti Puerto-Maderoda Le parc kompleksində yaşadığı mənzilində aşkarlanııb. Prokurorun masasında ölkə konqresinə təqdim etmək üçün işlədiyi sənədlər tapılıb.
Hamam otağında ölü vəziyyətdə aşkarlanan prokuror başından güllə yarası alıb. Qeyd edək ki, prokurorun 10 nəfər əməkdaşdan ibarət şəxsi mühafizəçisi olub. Ötən cümə günü mühafizəçilər prokuroru mənzilinin qapısına kimi müşayət ediblər. Prokuror şənbə günü evdə olub və mühafizəçilərindən bazar günü gəlmələrini xahiş edib. Bazar günü mühafizəçilər prokurorun evinə gəldikdə isə mənzilə daxil ola bilməyiblər və onların çağırışına heç kim cavab verməyib. Bu halda mühafizəçilər prokurorun anası ilə əlaqə saxlayaraq mənzilin açarını alıblar. Lakin mənzilə daxil olmaq üçün mütəxəssislərin köməyinə ehtiyac duyulub. Qapının içəri hissəsində qıfılda açar olması qapının çöl tərəfdən açılmasını mümkünsüz edib.

 

Polis mənbələrindən bildiriblər ki, mənzildə pistolet, güllə və giliz aşkar edilib. Prokurorun silah gəzdirilməsi ilə bağlı hüququ olub. Amma polisdən mənzildə tapılan pistoletin növü, güllə və giliz haqqında əlavə məlumat verilməyib.

 

Prokurorun ölümü nədən ola bilərdi?

 

Xatırladaq ki, mətbuatda Kristina Fernandes və xarici işlər naziri Hektor Temerman İranla gizli danışıqlara girərək Buenos-Ayresdə 1994-cü ildə yəhudi mədəniyyət mərkəzində törədilmiş terror aktında Tehranın iştirakını ört-basdır etməyə razılıq veriblər. "La Nacion” qəzetinin yazdığına görə, xüsusi işlər üzrə prokuror Alberto Nisman tərəfindən üzə çıxarılan sövdələşməyə əsasən Argentina rəhbərliyi İranla yaxınlaşmaq və bu ölkədən taxıl əvəzində neft almaq üçün Tehranın yəhudilərə qarşı terrorda əlinin olmasını ört-basdır ediblər. Prokuror bildirib ki, prezident Fernandes bu məqsədlə İranla gizli danışıqlar kanalı yaradıb. Bu danışıqlarda Argentina xüsusi xidmət orqanlarının yüksək rütbəli əməkdaşları, deputatlar, hökumətyönlü xadimlər və Argentinanın müsəlman icmasının rəhbərləri iştirak ediblər. Prokuror gizli təhqiqat zamanı prezident Fernandes də daxil olmaqla yüksək vəzifəli rəsmilərin telefon danışıqlarının dinlənilməsi üçün order alıb.

 

Prokuror Nisman bəyan edib ki, istintaq prezident Fernandesin planlaşdırma naziri Xulio de Vidoya kabinetin keçmiş üzvü ilə əlaqə saxlamağı və ona İranla təmas qurmağı tapşırmasına dair təkzibedilməz sübutlara malikdir. Həmin söhbətdə prezident deyib ki, Argentinanın taxıl əvəzində neft alınmasına razı olduğu barədə təklifi İrana çatdırsın. Prokuror bu gizli sövdələşməyə görə prezident Fernandesin və digər vəzifəlilərin məhkəməyə cəlb olunmasını tələb edib. Bu qalmaqal İranla Argentina arasında imzalanan qarşılıqlı anlaşma və əməkdaşlıq memorandumundan iki il sonraya təsadüf edir. 1994-cü ildə Buenos-Ayresdə törədilmiş terror aktında 84 nəfər həlak olub. İsrail xüsusi xidmət orqanları bu terrorun İran tərəfindən törədildiyini bildirir. Hətta keçmiş prezident Mahmud Əhmədinejadın da bu terrorda əlinin olması barədə məlumatlar yayılmışdı.

 

 

Öldürülüb, yoxsa intihar?

 

Məhkəmə tibbi ekspertizasının nəticəsi bu gün məlum olacaq. Təhlükəsizlik məsələləri üzrə dövlət katibi Serxio Berni bildirib ki, yaxın müddətdə silahın üzərində mərhumun əl izlərinin olub-olmaması müəyyən ediləcək: "Əgər silah üzərində mərhumun əl izləri aşkar edilərsə bu hadisənin intihar olduğu müəyyənləşəcək.”  BMT-nin Təhlükəsizlik Şurasının iclasında iştirak etmək üçün Nyu-Yorka gələn Argentinanın Xarici işlər naziri Ektor Timerman prokurorun ölümü ilə bağlı açıqlama verməkdən imtina edib.  Baş nazir Xorxe Kapitaniç isə bu gün keçirilən ənənəvi mətbuat konfransında baş vermiş hadisənin obyektiv araşdırılacağı ilə bağlı zəmanət verib.
Müxalifətçi deputat Patrisiya Bulriç bəyan edib ki, baş verən hadisə Argentina hökuməti üçün heç də yaxşı əlamət deyil: "O, biz deputatlara çox vacib məlumat təqdimat ermək istəyirdi”
Paytaxt Buenos-Ayres şəhərinin meri Maurisio Makri də hadisəyə münasibət bildirib. Müxalifətdən olan mer deyib ki, ölümə baiskarlar cəzasız qalarsa bu nəticə institusional fəlakətlərə səbəb olacaq.   (analitik.az)