La Liqanın nüfuzlu komandaları əcnəbilərin əlinə keçir.
"Reuters”in xəbərində deyilir ki, çinli milyarder İspaniyanın La Liqa çempionatında oynayan "Atletiko" (Madrid) klubunun 20 faizini almaq fikrindədir. Bu barədə İspaniya mediası xəbər yayıb.
"Dalian Wanda” şirkətlər qrupuna rəhbərlik edən Vanq Jianlin futbol azarkeşidir. O, bu niyyəti barədə hələ paytaxt Pekində bəyanat vermişdi.
"Forbes” jurnalının hesablamasına görə, onun əlində 13,2 milyard dollarlıq nağd sərmayə var və o, Çinin ən varlı adamları sırasında dördüncü yeri tutur. Milyarder "Atletiko"ya ilkin olaraq 46,34 milyon dollar sərmayə qoymağı planlaşdırıb.
Maraqlıdır ki, "Atletiko” çinli milyarderin bu təşəbbüsü barədə hər hansı açıqlama verməkdən çəkinib. Ancaq məlum olan odur ki, son illər İspaniya çempionatına maraq dünyada artmaqdadır. Məsələn, "Malaqa” Qətərdən olan kral ailəsi tərəfindən hələ 2010-cu ildə alınıb. "Valensiya” isə demək olar ki, Sinqapurdan olan milyarder Peter Limə məxsusdur. O, komandanın böyük bir payına sahib olub.
La Liqanın ən varlı komandaları isə şübhəsiz ki, "Real” və "Barselona”dır. Onlar dünyanın ən öncül klubları sayılır və illik gəlirləri də digər komandalardan çoxdur. Bu komandalar Qətər və Birləşmiş Ərəb Əmirliyindən olan sərmayəçilərin əlindədir.
"Reuters” agentliyi vurğulayır ki, "Atletiko"nun Azərbaycanla da sponsorluqla bağlı müqaviləsi var. (musavat.com)
Xəbərdən istifadə edərkən istinad etmək vacibdir.
