ABŞ prezidenti Barak Obama Hindistandan sonra Səudiyyə Ərəbistanına yollanıb. O, Səudiyyə Ərəbistanını kralı Abdullanın vəfatı ilə bağlı kral ailəsinə başsağlığı verib.
Səudiyyə Ərəbistanının paytaxtı Ər-Riyadda ABŞ prezidentinin qarşılanma mərasimində kazus yaşanıb.
Səudiyyə Ərəbistanının kral ailəsinin mənsubları tərəfindən qarşılanan Barak Obamanın yanında xanımı Mişel Obama vardı.
Mişel Obama əri ilə təyyarədən enərkən onları Səudiyyə Ərəbistanının yeni kralı Salman qarşılayıb.
Salman ABŞ prezidenti Barak Obama ilə görüşsə də, Mişel Obamaya əl uzatmayıb.
Bundan sinirlənən Mişel Obamanın keçirdiyi hisslər üzündə əks olunmuşdu.
Üstəlik, Mişel Obama başına yaylıq bağlamamış və bununla da diplomatik etiketi pozmuşdu.
Səudiyyə Ərəbistanı mühafizəkar islam ölkəsi, hakimiyyətdə vəhabi rejimi olan dövlətdir və buraya ayaq basan bütün xarici ölkə vətəndaşları yerli qanunlara, təbii ki, riayət etməlidir.
Həmin qanunlar isə xanımlardan başıbağlı olmalarını tələb edir.
Mişel Obama, təbii ki, bunu bilir və onun başıaçıq olmasını müşahidəçilər Ər-Riyaddakı vəhabi rejimə meydan oxumaq kimi dəyərləndiriblər.
Səudiyyə Ərəbistanının yeni kralı Salmanın isə Mişel Obamaya əl verib görüşməməsi Birləşmiş Ştatların birinci ledisini lap təbdən çıxarıb.
Halbuki Mişel Obama müsəlman ölkələrinə səfərlərdə həmişə yerli adət-ənəyə, qaydalara sayğı ilə yanaşıb.
Məsələn, Malayziyada dövlət ərkanı ilə görüşlərdə və Kuala-Lumpura məscidə baş çəkəndə Mişel Obamanın başında yaylıq vardı.
... Barak Obamanın Ər-Riyadda keçirdiyi görüşlərdə Mişel Obamanın simasındakı narazılıq aşkar sezilirdi.
(milli.az)
Xəbərdən istifadə edərkən istinad etmək vacibdir.
