Koronavirusla bağlı yüksək riskli ölkələrdən gələn sərnişinlər müvəqqəti olaraq Honkonq beynəlxalq hava limanından tranzit kimi istifadə edə bilməyəcəklər.
Xeberle.com xəbər verir ki, bu barədə "Bloomberg" Agentliyi mənbələrə istinadən məlumat yayıb. Bildirilib ki, qərar təsdiqlənmə mərhələsindədir. İlkin məlumatlara görə, qadağa yanvarın 15-dən fevralın 14-dək davam edəcək. Honkonqun yüksək risk qrupuna daxil etdiyi ölkələrin siyahısına ənənəvi tranzit marşrutları da daxil olmaqla 150-yə yaxın ölkə və ərazi daxildir: Sinqapur, Avstraliya, ABŞ və bir sıra Avropa ölkələri.
Agentliyin məlumatına görə, məhdudiyyət diplomatlara, hökümət məmurlarına, həmçinin fevralın 4-də Pekində başlayacaq qış olimpiya oyunlarında iştirak edən idmançılara və işçi heyətə aid olmayacaq.
Daha əvvəl yerli idarəetmə orqanının rəhbəri Kerri Lam bildirmişdi ki, yanvarın 14-dən Honkonqda uşaq bağçaları və ibtidai məktəblərdə tədris koronavirusun yayılması təhlükəsinin qarşısını almaq üçün dayandırılacaq. Lam həmçinin peyvənd proqramının 5 yaşdan 10 yaşa qədər olan uşaqlara da aid edilməsini bildirmişdi.
Hazırda ÇXR-ın bu xüsusi inzibati rayonunda "Omikron” ştammı sürətlə yayılır. Həkimlər virusun ötürülmə zəncirini qırmaq üçün yoluxanların əlaqələrini və yerdəşmələrini izləyirlər.
Yanvarın 7-dən etibarən hakimiyyətin əmri ilə meqapolisdə idman, mədəniyyət və əyləncə obyektləri 2 həftəlik bağlanıb. Restoranlara saat 18:00-dan sonra yalnız çatdırılma üsulu ilə işləməyə icazə verilib. Bu tədbir Honqkonqda keçən ilin yayından bəri ilk dəfə qəbul edilib.
Xəbərdən istifadə edərkən istinad etmək vacibdir.
