Rusiyanın Ukraynaya hərbi müdaxiləsi səbəbilə bəzi ölkələr rus diplomatları "arzuolunmaz şəxs" elan edib.
Xeberle.com xəbər verir ki, Buçada törədilən qətliamdan sonra proses sürətlənib. Xarici ölkələrdən çıxarılan diplomatların sayı 250 nəfəri keçib.
Bu gün Yunanıstan da Rusiyanın 12 diplomatını "persona non-qrata" elan edib və onlardan ölkəni tərk etmələri tələb olunub. Həmçinin İspaniya hökuməti Rusiyanın krallıqdakı səfirliyində çalışan 25-ə yaxın diplomatı ölkədən çıxarmaq qərarına gəlib.
"Sizə bildirmək istəyirəm ki, biz ölkəmizin təhlükəsizlik maraqlarına təhlükə yaradan rusiyalı diplomatları və Rusiyanın İspaniyadakı səfirliyinin əməkdaşlarını ölkədən çıxarmaq qərarına gəldik”, - deyə İspaniya XİN-dən bildirilib.
Eyni zamanda, İsveç Xarici İşlər Nazirliyi üç rus diplomatı ölkədən çıxarmağı qərara alıb. Bu barədə çərşənbə axşamı keçirilən mətbuat konfransında ölkənin xarici işlər naziri Ann Linde bildirib.
Bundan başqa, Litva hökuməti Rusiya-Litva diplomatik missiyasının statusunu aşağı salmaq qərarına gəlib. Nazirlər Kabineti Rusiya səfirinə Vilnüsdən getməyi əmr edib və ardınca Litva səfirini Moskvadan geri çağırıb.
Latviya hakimiyyəti də Rusiya ilə diplomatik münasibətlərin səviyyəsini aşağı salıb. Diplomatik departamentin rəhbəri Edqars Rinkeviç bildirib ki, Riqa daxili prosedurlar başa çatdıqdan sonra konkret tədbirlərini açıqlayacaq.
Rusiyanın Parisdəki səfirliyinin nümayəndələri də bu ölkədən çıxarılır. Habelə Rusiyanın Berlindəki səfiri Almaniya Xarici İşlər Nazirliyinə çağırılıb və diplomatik missiyanın 40 əməkdaşının ölkədən çıxarılması barədə ona məlumat verilib.
Beləliklə, İtaliya 30, Danimarka 15, İsveç 3, Fransa 30, Almaniya 40, Niderland 17, Belçika 21, İrlandiya 4, Çexiya 1, Şimali Makedoniya 5, Polşa 45, Bolqarıstan 12, Litva 4, Estoniya 3, Latviya 3, Slovakiya 3, Monteneqro 1, Lüksemburq 1, Norveç 3 rusiyalı diplomatı arzuolunmaz şəxs elan edərək ölkədən çıxarıb.
Onu da qeyd edək ki, ABŞ Moskvanın BMT-dəki nümayəndəliyinin 12 diplomatını ölkədən qovaraq, Rusiyaya növbəti zərbəni vurub.
Xəbərdən istifadə edərkən istinad etmək vacibdir.
