"Nə olsun ki, çətin olacaq? Böyük uğurların yolu əzablardan və itkilərdən keçir. Nə olsun ki, siz çox çalışırsınız və sizdə hələ ki, heç nə alınmır? Cəsarətli olmaq həmişə düzgün seçimdir. Nə olsun ki, insanlar sizin ideyalarınızın arxasınca getmir? Nə olsun ki, siz əzab çəkirsiniz? Cəsarətin qiyməti budur”. Bu sitat "Ən yaxşı versiyan ol. Adi insanlar necə görkəmli simalara çevrilirlər” kitabındandır. İlhamverən bu kitabın müəllifi biznes-strategiya üzrə mütəxəssis Den Valdşmidtdir. O, mindən çox tarixi şəxsiyyəti bir yerə yığıb araşdırdıqdan sonra adi insanların necə müxtəlif sferalarda uğur əldə etdiklərini müəyyən edib. Maraqlısı ondadır ki, bütün bu fərqli insanları eyniləşdirən ümumi bir xarakteristika mövcuddur. Və bu xüsusiyyətləri müəllif öz kitabında aşkara çıxarır. Valdşmidtin fikrincə, məhz bu, əsl uğurun səbəbidir. Sözügedən kitabı oxuduqda insan özünə inanmağa, stimul almağa başlayır. Hətta kitab hər şeydən usanıb qollarını yanına salan bezmiş insanları belə ruhlandırmaq qabiliyyətinə malikdir: "Səhv edərək siz yeni imkanlar yaradırsınız” – deyir müəllif və bunu yazdıqları ilə sübut edir. "Bu gün sizin çoxdandır həsrətində olduğunuz qələbə çalacağınız gün ola bilər. Əgər istədiyiniz birinci və ikinci dəfədən alınmayıbsa, lap elə bir neçə cəhddən sonra alınmayıbsa, bu hələ o demək deyil ki, heç vaxt alınmayacaq. Bəlkə, məhz növbəti dəfə uğur sizin üzünüzə güləcək?” Dilimizə hələ tərcümə olunmayan kitabın bəzi hissələrini oxuculara təqdim etməklə, onlara kömək ola biləcəyimizi düşünürük.  Adi insanlar necə görkəmli simalara çevrilirlər” kitabından seçmələri təqdim edirik:  

Ziqmund Freyd (1856-1939) – psixoanaliz elminin banisi Freyd ilk dəfə Avropada öz nəzəriyyəsi ilə elm adamlarının önündə çıxış edəndə onu məsxərəyə qoymuşdular. Buna baxmayaraq, o, öz araşdırmalarına davam etdi və sonda səhnədən qovulmasına səbəb olan psixoloji nəzəriyyəsinə görə "Göte” mükafatına layiq görüldü.  

Uinston Çörçill (1874-1965) – Böyük Britaniyanın baş naziri (1940-1945, 1951-1955) Uinston Çörçill XX əsrin ən böyük siyasi xadimlərindən biridir. 65 yaşında seçkiləri uduzmasına baxmayaraq, baş nazir vəzifəsinə təyin olunub. Kral keçmiş baş nazirin fəaliyyətinə etimadsızlıq səbəbindən son qoyandan sonra Uinston Çörçilli baş nazir təyin etdi.

Albert Eynşteyn – müasir nəzəri fizikanın yaradıcılarından biri, fizika üzrə Nobel mükafatı laureatı Albert Eynşteyn dörd yaşına qədər danışmayıb, yeddi yaşına qədər adi sözləri belə oxuya bilməyib. Hər kəs onu qabiliyyətsiz və əqli qüsurlu hesab edərkən, Eynşteyn müasir fizika elminin əsasını qoydu. Dünyanın 20-dən çox nüfuzlu universitetlərinin, o cümlədən, bir çox elmlər akademiyasının, SSRİ EA-nın fəxri xarici üzvü hesab olunur. 

Henri Ford (1863-1947) – avtomobil istehsalçısı, "Ford Motor Company” şirkətinin qurucusu Henri Ford bir müddət fermer kimi fəaliyyət göstərib, daha sonra usta köməkçisi və mexanik kimi işləyib. Bu işlərin heç birində uğur əldə edə bilməyib. Düz dörd dəfə müflis olub, hər şeyini itirib. Bütün bunlara baxmayaraq, o, bu gün bütün dünyada məşhur olan "Ford Motor Company” şirkətinin yaradıcısıdır. 

Lev Tolstoy (1828-1910) – Dünya ədəbiyyatında əvəzedilməz rola sahib yazıçı Lev Tolstoy təhsil aldığı hüquqşünaslıq fakültəsindən xaric edilib. Universitetdə dərs deyən müəllimlər onu bacarıqsız və istedadsız hesab edirdilər. O isə dünyanın ən dahi yazıçılarından biri oldu. Dünyanın elə bir yeri yoxdur ki, orda "Hərb və sülh”ü kimin yazdığını bilməsinlər. Tolstoy "Hərb və sülh” və "Anna Karenina” əsərləri ilə dünya ədəbiyyatında roman janrının ən görkəmli nümunələrini yaradıb. XIX əsr rus cəmiyyətinin realistik mənzərəsini canlandıran bu iki əsər realizmin yüksək zirvəsində qərar tutur. 

Vinsent van Qoq (1853-1890) – məşhur holland rəssam – postimpressionist Vinsent van Qoq həyatı boyu yalnız bir əsərini satmağa müvəffəq olub. Onu da yaxın dostunun bacısı alıb. Özü də 50 dollara. Dahi holland rəssam 800-dən çox şedevr əsər yaradıb və hazırda bu əsərlərin qiyməti 1 milyard dollardan başlayır. Təəccüblüdür, elə deyilmi? 

Çarlz Şultz  (1922-2000 ) – "Peanuts” komikslər seriyasının müəllifi Çarlz Şultz  yaradıcılığa başladığı dövrlərdə bütün karikaturalarını yolladığı redaksiyalardan "yox” cavabı alırdı. Heç bir mətbu orqan Çarlzın karikaturalarını çap etdirmək istəmirdi. Onun möhtəşəm karikaturaları elə məktəb jurnallarında da qalmışdı... "Walt Disney” şirkətlər qrupuna müraciət etməsinə baxmayaraq, sözügedən kompaniya da Çarlz Şultzla əməkdaşlıqdan imtina edir. Bir müddət sonra isə o, dünyanın ən məşhur komikslər seriyasını yaratdı – "Peanuts”. İndi bütün dünyada məşhur olan bu komikslərin yaradıcısı məhz müxtəlif kompaniyalar tərəfindən qəbul olunmayan, "istedadsız” hesab edilən Çarlz Şlutzdur.

Con Krizi (1908-1973 ) – dünyanın ən məşhur kriminal, detektiv yazıçılarından biri Con Krizi satıcı kimi, kargüzar kimi, fabrik işçisi kimi fəaliyyət göstərsə də, sadaladığımız heç bir sahədə uğur qazanmağa müvəffəq ola bilməyib. Ta ki öz əsl peşəsinə – yazıçılığa başlayana qədər. O, 600-dan çox roman yazıb və ümumilikdə 754 redaksiya tərəfindən rədd edilib. Bütün bunlara baxmayaraq, Con yazmağa və özünə inanmağa davam edib. Hazırda Con Krizi detektiv janrı üzrə yazan dünya şöhrətli yazıçılar arasında birinci yeri tutur. 

Henk Aaron (1934) – dünya beyzbol tarixinin ən yaxşı idmançılarından biri Henk Aaron "Bruklin Dodjers” beyzbol klubuna qəbul ola bilməyib. Oynadığı ilk beyzbol oyununda 0:5 hesabı ilə məğlub olub. Bir müddət keçdikdən sonra isə Henk Aaron Beyzbol Liqasının əsas rekorduna imza atıb və bütün dünyada şöhrət qazanıb. 

Sten Smit ( 1946 – ) – səkkizqat "Devis” kubokunun sahibi Sten Smitin tennisə olan marağı hələ uşaq yaşlarından özünü göstərirdi. Amma ləng olduğuna görə onun topları daşıyan oğlan vəzifəsinə belə qoymurdular. İllər sonra Smit səkkiz dəfə "Devis” kubokunu qazanır və dünyanın ən yaxşı tennisçilərindən biri kimi adını tarixə yazdırır.   (kult.az)