Türkiyə prezidenti Rəcəb Tayyib Ərdoğan NATO-ya üzv olmaq üçün müraciət etmiş İsveç və Finlandiyadakı səfirləri dəyişib.
Xeberle.com xəbər verir ki, bununla bağlı "Resmi gazete”nin məlumatında bildirilib.
Finlandiya və İsveç mayın 18-də Ukraynada baş verən hadisələr fonunda alyansa qoşulmaq üçün ərizəni NATO-nun baş katibinə təqdim edib. Türkiyə bu müraciətlərə baxılması prosesinin başlamasını əngəlləyib.
Türkiyə prezidenti Rəcəb Tayyib Ərdoğan bildirib ki, Ankara Finlandiya və İsveçin NATO-ya üzvlüyünə "hə” deyə bilməz, çünki onların Türkiyədə qadağan olunmuş Kürdüstan Fəhlə Partiyasının (PKK) nümayəndələri ilə münasibətlərə dair verdiyi vədlərə inana bilmir.
"Resmi gazete”nin xəbərinə görə, Ərdoğan 25 ölkədə yeni səfir təyinatına imza atıb, 23 ölkədəki səfiri geri çağırıb.
Prezidentin sərəncamları ilə NATO-ya üzvlük üçün müraciət edən və Ankara ilə fikir ayrılığı olan İsveç və Finlandiyadakı səfirlər də dəyişdirilib.
Belə ki, beynəlxalq tanıtım və mədəniyyət üzrə baş menecer vəzifəsində çalışmış Dəniz Çakar Finlandiyaya, Türkiyə Xarici İşlər Nazirliyində ikitərəfli siyasi məsələlər üzrə baş direktor vəzifəsində çalışmış Can Tezel isə İsveçə səfir təyin edilib.
Xəbərdən istifadə edərkən istinad etmək vacibdir.
