Baltik ölkələri üzərində real təhlükə yaranıb və onlar hücumu ən azı 3 gün ərzində təkbaşına dəf etməyə hazırlaşmalıdır.

Bu barədə Litva prezidenti Dalya Qribauskayte xarici jurnalistlərin ölkədə həqiqi hərbi xidmətə çağırışın bərpasına dair suallarına cavab verərkən deyib. Bundan əvvəl Britaniyanın müdafiə naziri də Baltik ölkələrinə qarşı real hərbi təhlükənin yarandığını bəyan etmişdi. Söhbət şübhəsiz ki, Rusiyanın hərbi təhdidlərindən gedir.

"2008-ci ilə qədər bizdə həqiqi hərbi xidmət olub, ancaq biz fikirləşdik ki, buna artıq ehtiyac yoxdur. Lakin bizim sərhədlərimizin yaxınlığında geosiyasi situasiya dəyişdi, biz başa düşdük ki, təhdid realdır. Təhdid bütün region üçün, Baltik ölkələri üçün realdır. Bizim qonşularımız daha az proqnozlaşdırıla bilən olublar, mən Rusiyanı nəzərdə tuturam”-Qribauskayte bildirib.

Litva prezidenti Rusiya ordusunun Kalininqrad vilayətində, Baltik dənizində, Baltik regionuun hava məkanında fəallığının artdığını qeyd edib. O deyib ki, Rusiya bombardmançılarının uçuşu mülki aviasiyaya təhdid yaratmaqdadır.

Prezident NATO-nun qərar mexanizmlərinin ani təhdidlərə qarşı cavab vermək üçün çevik olmadığını da etiraf edib. "Bizə NATO-nun prosedurları məlumdur. Çevik reaksiya qüvvələri ən tezi 72 saatdan sonra hərəkətə keçə bilər. Baltik ölkələri isə böyük deyil. Biz özümüz azı 72 saat, ola bilsin daha çox müdafiə olunmalıyıq”-Litva prezidenti bildirib.

Onun sözlərinə görə, həqiqi hərbi xidmətin bərpası o deməkdir ki, Litva müdafiə olunacaq. Prezident deyib ki, Baltik ölkələrinə qarşı artıq indidən informasiya müharibəsi və kiberhücumlar başlayıb. "Biz cəbhə xəttindəyik, qarşıdurmanın birinci mərhələsi gedir. Mən informasiya müharibəsini, təbliğatı və kiberhücumları nəzərə tuturam. Beləliklə, bizə artıq hücum ediblər. Bu, konvensial qarşıdurmaya keçəcəkmi? Heç kim bilmir. Ancaq biz indidən aqressiv davranışdan müdafiə olunmalıyıq”-Qribauskayte bildirib.

Prezident daha sonra litvalı jurnalistlərə litvalıların öz vətənlərini müdafiə etməli olduqlarını deyib. "Biz almanlara, danimarkalılara necə deyə bilərik ki, gəlib bizi müdafiə etsinlər? Bir halda ki, biz özümüz bunu etmək istəmirik?”-o, bildirib.

Bu həftə Litva Müdafiə Nazirliyinin hazırlayıb parlamentə göndərdiyi layihəyə əsasən il ərzində 3500-ə yaxın çağırışçı orduya çağrılmalıdır. Həmçinin Litva ordusunun yuxarı say həddi artırılıb. Qanun qəbul edilsə çağırış avqust-sentyabr aylarında başlayacaq. Xidmət müddəti 9 ay olacaq. (Virtualaz.org)