"Apple” korporasiyası elmi tədqiqat və təcrübələrə daha az vəsait sərf etsə də, texnologiya bazarında liderliyini qoruyub saxlayır.

İKT.lent.az-ın "Bloomberg”ə istinadən verdiyi məlumata görə, 2015-ci maliyyə ilində "Apple” elmi-innovasion tədqiqatlara öz gəlirlərinin 3,5% faizini - 233 milyard dolların 8,1 milyard dollarını sərf edir.

"Apple”ın rəqibləri isə bu sahəyə daha çox pul ayırır. Məsələn, "Facebook” öz gəlirlərinin 21%-ni (2,6 milyard dollar), "Qualcomm” 22%-ni (5,6 milyard dollar), "Alphabet” ("Google” holdinqi) isə 15%-ni (9,2 milyard dollar) elmi axtarışlara xərcləyir.

Lakin bu sahədə geridə qalması "Apple”ın texnoloji liderliyinə təsir göstərmir. Şirkət bu məsələdə öz yaradıcısı Stiv Cobsun fəlsəfəsinə sadiq qalır. S. Cobs hələ 1998-ci ildə deyib ki, innovasiyaların bu sahəyə neçə dollar sərf olunması ilə heç bir əlaqəsi yoxdur.