Universitet texnologiya, elektronika və proqramlaşdırma, robot texnologiyaları və digər mühəndislik yönlərində öz istedadını göstərmək və bu sahələrdə bacarıqlarını inkişaf etdirmək istəyən məktəbli və tələbələri "Makers’ Day 2018” tədbirində bir araya toplayır.

400-ə yaxın gəncin qatıldığı tədbir iştirakçılar üçün təcrübə qazanmaq, eyni zamanda yeni əlaqələr yaratmaq və məşğulluğun daha məqsədyönlü təmin olunmasının dəstəklənməsi baxımından əhəmiyyətlidir. Tədbirdə tanınmış şirkətlərin menecerləri, mühəndisləri ilə yanaşı öz şirkətini qurmuş və uğurla inkişaf etdirən şirkət rəhbərləri də iştirak edəcəklər. Burada gənclərin şirkət təmsilçiləri ilə əlaqələr qurmaq, onlarla müzakirələr aparmaq imkanı olacaq.

Əvvəlcə ayrı-ayrı şirkətlərin təmsilçilərinin çıxışları dinləniləcək, daha sonra çıxışçılar iştiraçıları maraqlandıran sualları cavablandıracaqlar.

Təşkil olunmuş sərgidə isə müxtəlif kateqoriyalarda robotlar sərgilənəcək. Sərginin ən yaxşı işləri münsiflər heyətinin rəyi əsasında mükafatlandırılacaq.