Son vaxtlar əhalinin şikayətlərinə operativ surətdə baxmaq və problemlərini həll etmək üçün əksər dövlət qurumlarında "Qaynar xətt" fəaliyyət göstərir. Həmin qurumlar mütəmadi olaraq əlaqə telefonlarını vətəndaşların diqqətinə çatdırır və bildirilir ki, istənilən şəxs həmin xidmətə müraciət edərək problemlərinin həllinə nail ola bilərlər. Nəzərə alsaq ki, qarşıdan qış mövsümü gəlir, bu xidmətlərə edilən müraciətlərin sayının da artacağı şübhəsizdir. Paytaxtın əksər rayon icra hakimiyyətlərində "Qaynar xətt”lər fəaliyyət göstərir. Bakıdan çox da uzaqda olmayan Sumqayıt şəhər İcra Hakimiyyətinin də 164 nömrəli "Qaynar xətt”i var. Şəhər icra hakimiyyətinin sumqayit-ih.gov.az ünvanlı internet səhifəsində məlumat da yerləşdirib. Amma yaxşı olardı ki, saytda bu xidmətlə necə əlaqə yaratmaq qaydaları, xidmətin fəaliyyət müddətiylə bağlı müvafiq məlumatlar yer alardı. Sumqayıtın bir neçə yerində icra hakimiyyətində belə bir xidmətin fəaliyyət göstərməsiylə bağlı reklam lövhələrinə də rast gəlmək olar.

Görəsən, şəhər əhalisi necə "Qaynar xətt” barəsində məlumatlıdırlarmı?

Elə bu məqsədlə kiçik bir sorğu keçirdik. Tərcüməçi Əfqan Xəlilov belə bir xidmətin olduğunu bizdən eşitdiyini deyir: "İndi öyrəndim. İstifadə etməmişəm. Sağ olun ki, məlumat verdiniz.

Müəllim işləyən Elvin Babayevin isə bu barədə məlumatı yoxdur. Sumqayıt Dövlət Universitetinin tələbəsi Elşad Əliyev də xəbərsizdir. Aqil Cümşüdlü isə tamam fərqli cavab verdi:"142-dən başqa hansı cavab verir ki?”Yol tikintisi sahəsində işləyən Emin Alıyev də məlumatsız olduğunu bildirib. Narkoloq-həkim Natiq Qubadov da bu haqda məlumata malik deyil. İlahiyyatçı Əkrəm Həsənov da bilgisizdir. Hüquqşünas Feyruz Şivəxanovun cavabı isə daha maraqlıdır: "Bu nömrədən xəbərim yox idi. Onu bilirəm ki, Qaynar xətt nömrələri adətən qaynar yox, donmuş, buzlanmış vəziyyətdə olur. Günlərlə bu nömrələrə zəng etmək olmur.”

Jurnalist Bəhruz Salmanov da Sumqayıt şəhər İcra Hakimiyyətində "Qaynar xətt”in fəaliyyət göstərdiyini bizdən eşidir. Mühasib Vüqar Orucov da bu haqda heç nə bilmir. Mühəndis Rauf Abbasov isə məhəllələrindəki problemlərlə bağlı "Qaynar xətt”ə müraciət etmək niyyətindədir.

Nəticədə Sumqayıt sakinlərinin əksəriyyətinin icra hakimiyyətinin "Qaynar xətt”inin olması ilə bağlı məlumata malik olmadığının şahidi olduq. Bu da yaxşı oldu ki, sorğu zamanı onlar bu haqda bilgi aldılar.

Bəs görəsən, xidmətin işi necə qurulub, əhalini hansı problemlər narahat edir və ümumiyyətlə, adıçəkilən xidmətə müraciət edənlər varmı?

Bununla bağlı "Qaynar xətt"lə əlaqə saxladıq. İlk öncə mobil telefondan 164 nömrəsini yığdıq. Belə yığım forması ilə istədiyimizə nail ola bilmədik. Əvəzində isə Sumqayıtın telefon kodu 018, ardınca isə nömrəni yığdıq. Xidmətdən bizə bildirdilər ki, "Qaynar xətt” 24 saat Sumqayıt sakinlərinin ixtiyarındadır. Əlavə suallarımızı isə cavablandıra bilməyəcəklərini qeyd etdilər: "Xidmət növbətçilik sistemi üzrə fəaliyyət göstərir. Yəni İcra hakimiyyətində kim növbətçi olursa, o da telefona cavab verir. Bu, növbətçilik sistemi ilə həyata keçirildiyindən, bir tək mən ay ərzində daxil olan zənglər və müraciətlərin məzmunu haqda sizə məlumat verə bilməyəcəm.”

Sumqayıt şəhər İcra Hakimiyyətinin informasiya təminatı və analitik təhlil şöbəsinin müdiri Ayaz İmaməliyev Xeberle.com-a bildirdi ki, "Qaynar xətt” xidməti artıq bir neçə aydır ki, şəhər sakinlərinin ixtiyarına verilib. O qeyd etdi ki, xidmətə müraciət edən vətəndaşların müraciətləri müvafiq qurumlara yönəldilir və operativ şəkildə həllini tapır. A.İmaməliyev icra başçısının qəbulunda sakinlər tərəfindən qaldırılan problemlərin məzmununun "Qaynar xətt”ə daxil olan müraciətlərin məzmunu ilə eynilik təşkil etdiyini vurğuladı.

Nə etmək lazımdır?

Göründüyü kimi, sakinlərin əksəriyyətinin bu xidmət barəsində məlumatı yox dərəcəsindədir və ya ümumiyyətlə yoxdur. Ekspert İradə Yaqubova deyir ki, "Qaynar xətt”lərdən istifadə etmək o qədər də asan deyil. Bunun vətəndaşlara çatdırılması üçün bir forma olmalıdır: "Məsələn, arxasında bütün nömrələr olan təqvimlər buraxılmalıdır. Bu nömrələrə zəng pulsuz olmalı, gələcəkdə bu nömrələrdən sui-istifadənin qarşısının alınması məqsədilə bütün zənglərin qeydiyyata alınması təşkil oluna bilər. "Qaynar xətt” nömrələri əhalinin nəzərinə TV, radio, kütləvi çap vasitələri, küçə lövhələri, kitabçalar, təqvimlər və digər yerlərdə yerləşdirilən sosial reklamlar vasitəsilə çatdırıla bilər. Burada həm telefon nömrələri, zənglərin şərtləri, avtomatik qəbuledicilərlə davranış, ötürülən məlumata görə cavabdehlik və digər məsələlər açıqlana bilər.”

R. Zeynallı, xeberle.com