Bildiyiniz kimi dekabrın 23-də Azərbaycanda növbəti bələdiyyə seçkiləri keçiriləcək. Bələdiyyə seçkilərinə sayılı günlər qalıb. Namizədlərin təbliğat-təşviqat kampaniyası demək olar ki, başa çatmaq üzrədir. Buna baxmayaraq, təkcə Sumqayıt şəhərində deyil, ümumilikdə cəmiyyətdə seçki abu-havası hiss olunmur.

Reklam lövhələrində namizədlərin şəkilləri də gözə dəymir. Halbuki, Sumqayıt şəhərində bələdiyyə seçkilərində 71 nəfərə yaxın namizəd iştirak edir. Sumqayıt Bələdiyyəsinə isə 19 üzv seçilməlidir.  Seçki marafonuna qatılanlar arasında bitərəflərlərlə yanaşı, müxtəlif siyasi partiya və qurumları təmsil edən namizədlər də var. Siyasi partiyaların xüsusilə, müxalifət partiyaları AXCP və Musavat partiyasının da seçkidə fəallığı hiss olunmur.

Musavat partiyası Sumqayıt şəhər təşkilatının sədri Fəxrəddin Abbas Musavat partiyasının bələdiyyə seçkilərində aktiv iştirak etməməsinin səbəbini belə izah edir: "Açığı bələdiyyə seçkiləri Sumqayıt müsavatçılarının yaralı yeridir. Bütün dünyada yerli idarəetmədə özünəməxsus, həlledici rolu olan bələdiyyələr Azərbaycanda səlahiyyətsiz, formal bir qurum rolunu oynayır. Faktiki olaraq heç bir əhəmiyyət kəsb etmir. Bunun nəticəsidir ki, nəinki beynəlxalq miqyasda, eləcə də ölkə daxilində də maraq və diqqət göstərilmir. Bu, özünü seçkiqabaği təşviqatin sönüklüyündə, ümumiyyətlə aparılmamasında da göstərir. Son dərəcə passivlikdir. Bələdiyyə üzvlərinin siyahısı əvvəlcədən müəyyənləşdirilir.”

F.Abbasov bildirdi ki, partiyanın Məclisi bələdiyyə seçkilərində iştirakla bağlı təşkilatlara və üzvlərə sərbəstlik verib: "İndiki bələdiyyə seçkilərində bütün ciddi cəhdimə baxmayaraq yalnız bir nəfərin namizədlik irəli sürməsinə nail ola bildim. Müavinim Sərvər Bağırsoy 41 saylı Sumqayıt I seçki dairəsindən Sumqayıt bələdiyyəsi üzvlüyünə namizədliyini irəli sürdü. Əvvəlcə müəyyən problemlər yaşansa da, mənim MSK-nın hüquq şöbəsinin müdiri İradə Hacıyeva ilə telefon danışığımdan sonra problem həllini tapdı və onun namizədliyi qeydə alındı. Təşkilatımızın bir üzvü Malik Zeynalov isə 44 saylı Sumqayıt-Xızı Seçki dairəsindən Sitalçay bələdiyyəsi üzvlüyünə namizədliyini irəli sürmüşdü. Çox təzyiqlərlə üzləşəsi oldu. Yalnız qeydiyyata bir gün qalmış DSK sədri Məzahir Süleymanova müraciətimdən sonra bu məsələ də həllini tapa bildi. Onun da namizədliyi artıq qeydə alınıb. Bu dəfə də  istənilən şəxs qutudan bələdiyyə üzvü kimi çıxarılacaq. Ona görə də elə bir ciddi təşviqat kampaniyasına lüzum görmədik.”

Azərbaycan Xalq Cəbhəsi Partiyasının Sumqayıt şəhər təşkilatının sədri İsa Qurbanov da partiyanın seçkidə iştirak etmək həvəsində olan üzvlərinə sərbəstlik verildiyini söylədi: "Amma, AXCP-dən seçkidə heç kim iştirak etmək istəmədi. Mən namizədliyimi verdim. Milli Məclisdə millət vəkili Qalib Salahzadənin çıxışından sonra bəyanat verərək, namizədliyimi geri götürdüm. Q.Salahzadə çıxışında bəyan etmişdi ki, artıq bələdiyyədə seçkilərində seçiləcək şəxslərin siyahısı hazırdır.”

İ.Qurbanov belə hesab edir ki, bu gün Sumqayıtda sorğu keçirilsə ki, bələdiyyə seçkiləri nə vaxt olacaq?” heç kim bilməyəcək: «Hakimiyyət də təbliğata maraq göstərmir. Seçki məntəqələri seçicilərə bildirişləri belə hazırlayıb paylamırlar.”

Müxifət partiyalarından fərqli olaraq hakim Yeni Azərbaycan Partiyasının Sumqayıt şəhər təşkilatı bələdiyyə seçkisində 19 nəfər namizədlə iştirak edir.

E.Səlimov qeyd edib ki, Yeni Azərbaycan Partiyasının Sumqayıt şəhər təşkilatı təbliğat kampaniyasını uğurla başa çatdırıb.

Seçicilərə isə dekabrın 23-də məntəqələrə gələrk öz seçimlərini etmək qalır.

Aytən, xeberle.com