Bu, reklam deyil!

Sumqayıtla bağlı maraqlı, qeyri-adi bir araq istehsal edilib. Belə ki, üzərində "I əsrdə Roma sərkərdəsi Pompeyin Qafqaza səfəri. Corat" yazıları əks olunan arağın yuxarı hissəsində "Sumqayıt" yazılıb.
Maraqlıdır, görəsən, istehsalçılar bununla nəyi demək istəyir, nəyə nail olmaq arzusundadırlar?
Ehtimalımız budur ki, onlar bu cür asan - "maarifçi-elmi" imic qazanaraq - yolla araqlarının daha yaxşı "raskrutka" olunub satılmasını istəyirlər.
Növbəti ehtimal odur ki, onlar elmimizi, tariximizi araq vasitəsilə təbliğ edərək gəncləri elmə səsləyərək, ayıldaraq, demək istəyirlər ki, Corat Sumqayıtın qədim yaşayış məskənidir və hətta Roma sərkərdəsi Pompey də buraya ayaq basıb...
Yaxud, ola bilsin, "göstərmək" istəyirlər ki, hətta Pompeyin də araqla arası yaxşı olub... Ehtimalların sırasını uzatmaq da olar, fakt faktlığındadır ki, belə bir araq artıq satışdadır...
Özü də araq ucuz da deyil, ha, Sumqayıtın marketlərinin birindən 6.30 AZN-ə alınıb. Digər tərəfdən təsəlli olur ki, nə yaxşı, bu gün spirtli içki istehsalçılarımız da "kreativ" şəkildə çıxış etməyə başlayıblar...

Elnur, "Xəbərlə" xəbər portalı
Foto Tərxan Paşazadənindir

P.S. Bu araq istehsalçıları yaxşı olardı ki, bir korrektor da tutaydılar ki, məhsullarının üzərində belə ciddi səhvlər getməsin. Birincisi, Pompeyin Qafqazda olması I əsrə deyil, eramızdan əvvəl I əsrə aid edilir. İkincisi də, etiketin ünvanı göstərən hissəsində "Naxçıvani küçəsi" əvəzinə, "Naxzıvani küçəsi" qeyd olunub.
Cənablar, bəlkə, çox tələsik alınıb?!