Ölkədə demək olar ki, hər gün dəm qazından zəhərlənmələr və ölüm hallarının baş verdiyi barədə məlumatlar eşidirik. Bir çoxu bunun günahını aidiyyəti qurumlarda axtardığı halda, qarşı tərəf əhalini ehtiyatsızlıqda suçlayır. Bəlkə elə buna görədir ki, istər əhalinin, istərsə də dövlətin hadisə baş verəndə səbəbini soruşacağı bir qurumun yaradılması təklif olunur.

Soyuq havalarda təbii qaza olan tələbatın çoxalması ilə dəm qazından boğulanların sayında da xeyli artım müşahidə olunur. Bu cür problemlərin yaranmasında əsas amillərdən biri kimi evlərdə tüstü bacalarının vaxtında təmizlənməməsi göstərilir. Tüstü bacalarının ildə bir neçə dəfə təmizlənməsinin vacibliyini nəzərə alsaq, indi belə qabaqlayıcı tədbirin əsl zamanıdır.

Ölkədə dəm qazından zəhərlənmə hallarının böyük əksəriyyətinin binalarda və evlərdə havalandırma sisteminin, eləcə də tüstü bacalarının illərdir təmizlənməməsi nəticəsində baş verdiyi faktını ortaya qoyur.

 Bəs görəsən Sumqayıtda tüstü bacalarını təmizləməyi MİS həyata keçirməlidir, yoxsa bu işin məsuliyyəti sakinlərin üzərinə düşür?

Sumqayıt şəhər Mənzil Kommunal Təsərrüfat İstehsalat İstismar Birliyinin sədri Abid Əliyev Xeberle.com-a bildirib ki, Mənzil İstismar sahəsində belə bir xidmət fəaliyyət göstərmir: «Mənzillərdə bacanı təmizləmək MİS-in vəzifəsinə daxil deyil. Sadəcə olaraq bacanın təmizlənməsilə bağlı sakinlər MİS-in xidmətindən bu şəkildə istifadə edə bilərlər. Xüsusi ödənişli xidmət təşkilatları var ki, sakinlərinin o təşkilatlarla əlaqə yaratmasına MİS əməkdaşları yardım edə bilər”

Belə məlum olur ki, ortada tüstü bacalarının təmizlənməsi problemi var, ancaq problemə cavabdeh heç bir qurum mövcud deyil.

Ramil, Xeberle.com