"Havaya buraxılan tüstü kabab tüstüsü olsa belə, Ekologiya və Təbii Sərvətlər Nazirliyi şadlıq evinə nəzarət edir”

Sumqayıtda hardasa bir obyekt tikiləndə şəhər sakinləri ilk olaraq "Ya supermarketdir, ya da ki, şadlıq sarayıdır”, - deyə düşünürlər. Əslində şəhər sakinlərinin dəfələrlə sonda özünü doğruldan bu fikir-ehtimallarını təbii saymaq olar. Çünki Sumqayıt şəhərində son illər tikilən obyektlərin böyük əksəriyyətini şadlıq evləri təşkil edir.

"Şadlıq sarayları mikrorayonu”

Hazırda şəhərimizdə təxminən 30–dan çox şadlıq evi var. Qiymətlər işıq sürətilə artdıqca şadlıq saraylarının sayı da artır. Rəqabət o qədər güclənib ki, artıq son illər tikilən şadlıq saraylarının daha çox fərqli üslubda, görkəmdə olmasına və sahəsininböyüklüyünə xüsusi diqqət edilir.

Eyni ərazidə böyük bir şadlıq sarayı varsa, onun yaxınlığında ondan daha da böyüyü tikilir. Çox təəssüf ediləcək haldır ki, obyektlərin böyük əksəriyyəti yol kənarında və yaşayış binalarının yaxınlığında inşa edilir.

Təkcə 17–ci mikrorayon ərazisində 9 adda (Büllur, Tural, Xarı Bülbül, Gold Palace, Dan Ulduzu, Dan Ulduzunun Avropa zalı, Şahanə, Qubadlı, Nur) bir–birinə az qala bitişik vəziyyətdə olan şadlıq evləri var. Bu ərazidə ilk şadlıq evi tikilməyə başlayanda təbii olaraq sakinlər narazılıq etdilər. Amma müxtəlif dövlət orqanlarına edilən şikayətlər cavabsız qaldıqdan sonra sakinlərin susmaqdan başqa çarəsi qalmır. Onlar susduqca ərazidə tikilən şadlıq saraylarının sayı da artır. Artıq 17-ci mikrorayonu cəsarətlə "Şadlıq sarayları mikrorayonu” adlandırmaq olar.

"Sakinləri tüstüyə boğsaq, gəlib bizi döyüb burdan qovarlar”

Şadlıq saraylarında tüstünün ətrafa yayılmasının qarşısı filtr vasitəsilə alınmalıdır.

Bəs görəsən sakinlərin sakitliyini öz bizneslərinə qurban verən obyekt sahibləri ziyafət günlərində kabab qoxusunun, manqal tüstüsünün evlərə yayılmaması üçün hər hansı bir tədbir görürlərmi?

Bu filtrlər tüstünün qarşısını nə dərəcədə ala bilir?

Hansı şadlıq evlərində yeraltı dayanacaqlar var? Yeraltı dayanacaqları olmayan saraylarda avtomobillər harada park edilir?

Toy şənliyi bitdikdən sonra ziyafət sahiblərinə fişənglərlə atəşfəşanlıq etməyə nə üçün icazə verilir?

Sualların cavablarını bir neçə şadlıq evlərində apardığımız araşdırma nəticəsində tapmağa çalışdıq.

İlk olaraq 47-ci məhəllədə yaşayış evlərinə yaxın ərazidə yerləşən "Ülvi” şadlıq sarayına üz tutduq. Ərazidə yaşayan sakinlər kabab qoxusundan evdə otura bilmədiklərini deyirlər. Amma şadlıq sarayının inzibatçısı Raiq bəy deyilənlərlərlə razılaşmır: "Şadlıq evi tikildiyi gündən tüstünün qarşısını almaq üçün filtr qurğusu qurulub. Ətrafa nə tüstü, nə də ki, qoxu yayılmır. Sakinlərin dedikləri yanlışdır”.

İnzibatçı avtomobillərin park edilməsi üçün şəraitlərinin olduğunu da deyir: "Toy şənliyi başlayanda maşınların park edilməsi üçün dayanacaq yerimiz də var. O ki qaldı fişənglərə, Fövqəladə Hallar Nazirliyinin xüsusi təlimatı var. Təlimata uyğun olaraq toy başa çatdıqdan sonra şadlıq evinin həyətində ziyafət sahiblərinə fişəng atmağa icazə vermirik.”

Şəhərin 10-cu mikrorayonunda yanacaqdoldurma məntəqəsinin yaxınlığında tikilən və min bir gecə nağıllarını xatırladan "Xəlifə” şadlıq sarayı nəhəngliyi ilə diqqəti cəlb edir. "Xəlifə”ni Sumqayıtın ən böyük şadlıq sarayı hesab etməyimiz inzibatçı Elçin İsayevin xoşuna gəlmədi. "Şəhərdə bundan da böyük şadlıq evləri var", - deyə bizə irad da tutdu. Ətrafa yayılan tüstü ilə bağlı sualımıza gəldikdə inzibatçı şadlıq sarayının bu günə qədər filtr qurğusunda problem olduğunu bildirsə də, sonradan bu problemin aradan qaldırıldığını qeyd etdi. E.İsayev şadlıq sarayında digər məsələlərə diqqət yetirildiyini söylədi: "Şadlıq sarayında həm yeraltı, həm də yerüstü geniş avtomobil dayanacağı var. Fövqəladə Hallar Nazirliyinin qadağası bu şadlıq evində də keçərlidir. "Xəlifə” şadlıq sarayının müdiriyyəti toy sahiblərinə fişəng atmağı qadağan edib.”

Növbəti üz tutduğumuz şadlıq saraynın adı "Nur”olsa da, qarşılanmağımız heç də nurlu olmadı. Özünü təqdim etməkdən çəkinən və güc-bəla ilə adının Şəmsəddin olduğunu öyrəndiyimiz baş inzibatçı bizə yaxınlaşan kimi diktofonu söndürməyi tələb etdi. Görünür, bəzi təşkilatlarda da çalışan vəzifə sahibləri kimi bu şəxs də KİV nümayəndələri ilə necə rəftar etməyin qaydasını hələ də öyrənə bilməyib. İnzibatçı "bizim ətrafa tüstü yaymaq kimi problemimiz yoxdur”, - dedi və əlavə etdi: "Görün "Nur” şadlıq evi yaşayış evlərindən nə qədər uzaqda yerləşir”.

"Nur” şadlıq sarayının inzibatçısı "gedin yaşayış evlərinə yaxın olan şadlıq evlərini araşdırın” kimi məsləhət verməyi də özünə borc bildi. Şadlıq evinin həyətində xüsusi dayanacaq olduğunu bizə göstərən Şəmsəddin müəllim toylarda fişəng atmağın dövlət tərəfindən qanunla qadağan edildiyini və bu qadağaya şadlıq sarayı müdiriyyətinin ciddi əməl etdiyini xüsusi olaraq qeyd etdi.

"Qubadlı" şadlıq sarayının inzibatçısı Fəxrəddin Məmmədov Ekologiya və Təbii Sərvətlər Nazirliyi tərəfindən ildə bir dəfə şadlıq evinin yoxlanıldığını söylədi: "Əgər filtr sistemi işləməsə, biz şadlıq evini işlədə bilərik?! Sakinləri tüstüyə boğsaq, gəlib bizi burdan döyüb qovarlar. Havaya buraxılan tüstü kabab tüstüsü olsa belə, Ekologiya və Təbii Sərvətlər Nazirliyi şadlıq evinə nəzarət edir.”

"Sizin şadlıq sarayında keçirilən toy şənliklərindən birində iştirakçıların həyətdə fişəng atdığına şahid olanlar var” deməyimizə Fəxrəddin müəllim bizi peşman etdi: "Kim deyib onu, tutun gətirin tarixi ilə sübut edək ki, belə bir şey olmayıb. Bizim şadlıq sarayında əsasən icarə ilə toy edirlər. Kasıbın 100 manatı hardadır fişəngə verib, havaya atsın?!” Əsəbiləşən inzibatçı şadlıq evinin həyətində fişəng atmağın qanuni yolla qadağan edildiyini və bu qanunu pozmağa heç kimsənin cəsarət edə bilməyəcəyini bəyan etdi.

Növbəti üz tutduğumuz məkan isə "Şahanə” şadlıq sarayı oldu. İnzibatçı Müşfiq müəllim şadlıq sarayının ətrafa tüstü yaymaq kimi bir problem yaşatmadığını bildirdi: "Bu vaxta qədər bizə belə şikayətlə müraciət edən olmayıb. Şəhər icra hakimiyyətindən bu məsələlərə nəzarət edilir. Şadlıq sarayının həm qarşısında, həm də arxa hissəsində yeraltı olmasa da, yerüstü dayanacağımız var. Toy günlərində heç bir tıxac problemi yaşanmır. Gecə saatlarında fişəng atmağa da icazə vermirik.”

"Dan Ulduzu” şadlıq sarayının müdiri Sərraf müəllim isə problemlərindən gileyləndi: "Biriniz gəlib yazmırsınız ki, ay filankəs müəllim, sizin nə probleminiz var?! Mən bu şadlıq evində nə qədər sumqayıtlını işlə təmin edirəm. Nə qədər insan burdan evinə çörəkpulu aparır. Biz imkansız ailələrə yardım edirik. Xeyriyyə işləri ilə məşğul oluruq. Kabab qoxusu zəhərli tüstüdür, nədir bəyəm?! Quru odundur yanır. Bu odun tüstüsündən ekologiya korlanmaz”.
Fişəngdən xoşlanmadığını deyən Sərraf müəllim şadlıq evinin həyətində heç kimə fişəng partlatmağa icazə verilmədiyini sözlərinə əlavə etdi.

Şəhərin böyük şadlıq məkanlarından olan "Gold Palace” şadlıq sarayının müdiri Pəhləvan Qasımov sarayın filtr sistemində nasazlıq olduğuna görə arada problemlər olduğunu gizlətmədi: "Yeni modern filtr alıb quraşdıracağıq. Bundan sonra şadlıq evindən ətrafa tüstü yayılmayacaq”.

Bu şadlıq sarayında ziyafət məclisləri olanda maşınların sıxlığı səbəbindən yolda tıxac yarandığını müşahidə etsək də P.Qasımov bunun əksini deyir: "Toy günlərində sarayın qarşısında avtomobillərin çoxluğu nəqliyyatın hərəkətinə heç bir maneçilik törətmir. Çünki maşınların rahat şəkildə park edilməsi üçün sarayın yeraltı dayanacağı var”.
Pəhləvan müəllim də fişəngin partladılmasına dövlət tərəfindən qadağan edildiyini və müdiriyyət olaraq bu qadağaya əməl etdiklərini söylədi.

Apardığımız araşdırmalardan gəldiyimiz tək nəticə budur ki, şadlıq saraylarının yaşayış evlərinə nə qədər yaxın olmasından asılı olmayaraq, obyekt sahibləri sakinlərin istirahətini pozmadıqlarını düşünürlər. Hər halda bunu onların öz dillərindən eşitdik.

Şadlıq evlərinin sahibləri nə dərəcədə haqlıdırlar, bilmirik. Bildiyimiz tək bir məsəl var o da budur: "Xalqımın toy kimi bir adəti vardır və bu gözəl adətə də hörməti vardır”.

Aytən ƏLİ
Xeberle.com