Sadə əl hərəkətləri ilə insana toxunmadan onu havaya qaldırır, daha sonra yerə endirir. Bu görüntülərdə isə tülün altından əvvəlcə bir ayağını, daha sonra isə hər iki ayağını bir anlıq yox edir. 29 yaşlı Şəhadət Bağırovun göstərdiyi bu fokus nömrələri ətrafdakıları da çaş-baş salır. Heç bir ali təhsili olmayan bu gənc dünyaca  məşhur hoqqabazlar Devid Kopperfild və Kris Encelin göstərdiyi fokus nömrələrini təkrarlamaq iddiasındadır.  

Şamaxıda yaşayan Şəhadət deyir ki, sehirbazlıqla uşaqlıqdan maraqlanır. Hətta bu sənətə olan maraq onu  təhsildən də yayındırıb. Ancaq o,  ən mürəkkəb fokus nömrələrini izləyib tez bir zamanda sirlərini açmaq qabiliyyətinə malikdir.

Sehirbaz etiraf edir ki, bütün göstərilənlər, göz yanılması və cəld əl hərəkətləri  əsasında baş verir. Bəzi fokus nömrələrinin 7 və daha çox sirri ola bilər, bu sirlərin öyrənilməsi üçün illər lazım gəlir. Ancaq səhnədə həmin nömrə, cəmi bir neçə saniyə davam edə bilər.

Şəhadət Bağırovdan daha bir fokus nömrəsini göstərməyi xahiş etdik. Və o, yenə də bizi təəccübləndirə bildi.

Şəhadət Bağırov deyir ki, bu sənətlə məşqul olmağının əsas səbəbi insanları təəccübləndirmək həvəsidir. Və 17 ildir ki, bu həvəsin dalına düşüb... Hazırda o, daha mürəkkəb fokus nömrələri üzərində çalışır.