Xeberle.com Sumqayıt Dövlət Musiqili Dram Teatrının aktrisası, əməkdar artist Xatirə Süleymanova ilə müsahibəni təqdim edir:

Hazırda Sumqayıt Dövlət Dram teatrında Georgi Xuqayevin "Varlı ev” tamaşası üzərində iş gedir. Orda ana obrazını oynayacam. Tamaşanın məşqləri gedir. Quruluşçu rejissor Respublikanın xalq artisti, Prezident mükafatçısı, teatrın baş rejissoru Firudin Məhərrəmovdur. Teatrın bir çox lirik-psixoloji dram əsərlərində baş rolda oynamışam. Georgi Xuqayevin "Varlı ev” əsəri də gərgin sujet xətti olan əsərdir. Sözün əsl mənasında böyük bir faciədir. Bir ailənin faciəsini üzə çıxaran bir əsərdir. Tamaşa həmişə tamaşaçılarla qiymətli olar. Ümid edirəm ki, tamaşaçılar digər əsərlər kimi, bu əsəri də bəyənərlər. Bundan əlavə, dünya xalqlarının nağılları əsasında qurulmuş "Yuxu” tamaşasına da hazırlıq gedir. Tamaşanı teatrımızın gənc rejissoru Fuad Kazımov hazır edib. Artıq, tamaşanı təhvil vermişik. Əsər nağıllar əsasında qurulmuş uşaq tamaşasıdır. Kino və seriallarda hazırda rol almamışam. İki kinoya çəkilmişəm. Biri Dilarə Əliyevanın baş rol aldığı film olub. Onu da qeyd edim ki, biz Dilarə Əliyeva ilə tələbə yoldaşı olmuşuq. Allah Oqtay Əliyevə də rəhmət eləsin. Bu yaxında Rüfət Şahbazovun rejissoru olduğu "Ata ocağı” serialında da rol almışam. Onu da qeyd edim ki, Rüfətin bir çox seriallarında oynamışam. Rüfət Şahbazov yeni çəkdiyi kinoya da dəvət edib. Orda da rol almışam. Bu yaxında film tamaşaçıların ixtiyarına veriləcək. 

Çox seriallarda rol almışam, bunları saymaqla bitməz. Hətta, bəzən dostlarla keçmişdən söhbət açan zaman xatırlayıram ki,  bu serialda da rol almışam. Mənim üçün həm kinoda çəkilmək, həm də teatrda rol almaq çox doğmadır. Peşəmi icra edərkən bütün dərddən, qəmdən uzaqlaşıram. Sevdiyim işlə məşğul olduğum üçün özümü bəxtəvər və xoşbəxt hiss edirəm. Bütün həyatın keşməkeşini kənara qoyub, düşünürəm ki, nə yaxşı ki bu sənətə sahibəm. Bu sözləri yada salarkən, oynadığım Elçin Əfəndiyevin "Qatil” tamaşasını xatırlayıram. Sumqayıt Dövlət Teatrında bu əsərdəki kimya müəlliməsini canlandıran obraz mən idim. Əsərdə kimya müəlliməsi həyatına gələn qəfil sevgidən özünü çox xoşbəxt hiss edir. Və bu sözlərlə ifadə edir: " Nə yaxşı mən yaşayıram. Bu sözlər gurultulu səslənir eləmi? - qoy səslənsin" . Bu sözləri yada salmaqda məqsədim, aktyor üçün dünyanın ən xoşbəxt hiss etdiyi məqam məhz izləyici, tamaşaçı qarşısında olduğu vaxtlardır. Bu bir növ şəxsi həyatımızda baş verən çətinliklərdən və problemlərdən də bizi uzaqlaşdırır. Elza Seyidcahan oxuyur : " Aktyor səhnədə fironluq eylər. Aktyorun qazancı çiçəkdir, qucaq-qucaq. Səsimiz və şəklimiz bizdən çox yaşayacaq". Oynadığım rolların sayını hesabını itirmişəm. Amma kinolarda seriallarda çox çəkilmişəm  həmçinin teatrda tamaşaçı qarşısına da çox çıxmışam. Özümü şanslı aktrisa hesab edirəm . Çünki, sevdiyim işlə məşğulam. Səhnədən çıxdıqdan sonra, şəxsi həyatımdakı bəzi problemlərə nöqtə qoymağı bacarıram.

Aylıq qazancınız dolanışığınıza yetir? 

Artıq 24 ildir ki, tək ailə başçısı olmuşam. Övladlarımı tək boya-başa çatdırmışam. Mənim üçün bu həddindən artıq çətin olub. Hətta, yaşadıqlarım qarşısında çətində bunu ifadə etməkdə yüngül kəlmədir.  Mənə çox zülm olub. "Ay Allah mən nə edəcəm?”- ifadəsi günlük işlətdiyim kəlmələrdən idi. Bundan başqa sabahı da düşünməli idim. "Sabah nə edəcəm? " - Əslində günümüzdə aktyor və aktrisa maddiyyat cəhətdən o qədər rahat yaşamalıdır ki, onun dərdi-səri ancaq oynadığı obrazlarda olsun. Amma, mən özümü və mənim kimi olanları nəzərdə tutub deyərdim ki, biz böyük fədailərik.  Canımızı həm ailəmizə, həm də sənətimizə qurban verdik. Daha sonra illər keçdikcə şahidi olursan ki, övladlar böyüyüb, sənətində uğurlar əldə etmisən. Mən belə övladlara sahib  olduğum  üçün şükür edirəm. İşlədiyim  kollektivlərim  övladlarımın tərbiyəli, böyük ədəbə və mədəniyyətə malik olmasından mənə söz açır. Şükür ki, Allah mənə belə gözəl nemət verib.  Onlar hərəkətləri ilə mənim üzümü həmişə ağ ediblər.  Demək istəyərdim ki, onları həyatım qədər çox sevirəm. Məhz, buna görə övladlarımın adını telefonda belə qeyd etmişəm: "ürəyim, həyat simfoniyam, həyatım ". Həmişə uşaqlarıma deyirəm ki, siz mənim həyat simfoniyamsınız. Siz pis səslənsəz, deməli mən yaxşı bəstəkar olmadım. 

Sumqayıt Dövlət Dram teatrında 20 ildən çoxdur ki, çalışıram. Şəhər rəhbərliyi tərəfindən teatrımıza hər zaman böyük qayğı göstərilib. Çox aktyorlarımızın ev və torpaqla təmin olunmasında, adlarının yüksək titullara getməsində şəhər rəhbərliyinin önəmli rolu olub. Düzdür, mən hələ nə ev, nə də torpaq almışam. Amma, Respublikanın "əməkdar artisti” adına layiq görüldüm. Cənab Prezidentin mənə layiq gördüyü titulu şəhərimizin rəhbəri Zakir Fərəcov şəxsən təqdim edib. Kaş ki, anam bu günümü görərdi...Amma, mənə təqdim edilən gülü anamın məzarına apardım. Məzarı önündə hönkür-hönkür ağladım. Ailəlikcə hamımız musiqini sevən olmuşuq. Anam Səməd Vurğunun "Vaqif” dramını əzbərdən bilirdi. Həqiqətən də şəhər rəhbərliyinin çox böyük diqqəti var. Sevinirəm ki, elə Sumqayıtda doğulub-böyümüşəm. 

Çox şükür ki, seriallarda rol alıram. Düzdür, bu il rol almadım. Seriallarda rol almaq biz aktyorlara stimul verir. Əlavə qazanc yerimiz olur. Əlbəttə ki, dövlət vergisini ödəməklə çalışırıq. Qış-yay bilmədən çəkilişlərdə oluruq. Xalqımıza xidmət edirik. Eyni zamanda, sevdiyimiz sənətlə məşğul oluruq. Bu da bizim sevib-seçdiyimiz sənətdir. Heç vaxt peşman olmamışam. Mənim uğurlarımın açarı anam və atam olub. Anam həmişə deyirdi ki - "oxuyun”. Artıq əlimiz çörəyə çatanda anamızı itirdik. Firudin Məhərrəmov ən çətin anımda yanımda olub. Məni Sumqayıt Dövlət Dram teatrına dəvət etdi. Müəllimim olaraq ona borcluyam. Həmin ərəfələrdə anamı, qardaşımı və həyat yoldaşımı itirmişdim. Bu məni çox depressiv vəziyyətə salmışdı. İlk dəfə tamaşaçıların alqışını alanda fikirləşdim ki, həqiqətən yaşamağa dəyər. 

İnanırsınız ki, heç arxaya dönüb baxmaq istəmirəm (kövrəlir). Bəlkə də indi-indi gözümün dolmadığı vaxtlardır. Çox yorğun oluram. Nəyisə düşünməyə vaxtım olmur. Amma, sakit vaxtı həzin musiqi dinlədikdə, keşməkeşli həyat yolum kino lenti kimi gözümün önündən keçir. Daha sonra hönkür-hönkür ağlayıram. Sözün əsl mənasında mən bu həyatda heç xoşbəxt olmadım. Düzdür, həyat başdan ayağa xoşbəxtlikdən ibarət deyil. Amma, müəyyən anlar var ki, insan özünü xoşbəxt hiss edə bilər. Təəssüf ki, o anlar məndə çox az olub. Övladlarım çox nümunəvi yetişib. Atasız da olsalar əxlaqlıdırlar. Bu günə qədər çətinliklərim çox olub. Hönkür-hönkür ağladığım vaxtlarım da olub. İnşallah bundan sonra daha yaxşı olar. Allah mənə elə bir güc versin ki, ömrümün sonuna qədər sənətimlə məşğul olum. Səhnədə özümü çox xoşbəxt hiss edirəm. Tamaşaçıların sevgisi mənə bəs edir. 

Ən çox yaddaşlarda qalan rolunuz hansı olub?

Çox rollarım yaddaşlarda qalıb. İstər kinoda, istərsə də serialda…Mən şanslı insanam. Öz üzərimdədə çox işləməyi sevirəm. Xırda obraz da olsa, onu elə oynamalıyam ki, məndən başqa kimsə oynaya bilməsin. Amma, bəzi rollar var ki, ərizə yazıb roldan imtina etmişəm. Çünki, özümü o rolda görmürəm. Bu o demək deyil ki, oynaya bilməyəcəm. Bilirəm oynayacam, sadəcə istdəyim kimi oynamayacam. Biri var göstərim, biri də var yaşayım. Mən rolu göstərmək istəmirəm, yaşamaq istəyirəm. Oynadığım ən xırda obraz da yaddaşlarda qalıb. Məsələn "Oğlan evi”ndə xırda obraz olan hakimi oynamışam. Bu obraz kiçik də olsa izləyicilərin yaddaşında qalıb. Teatr insanı insana insanla göstərən sənətdir. Mən sizin özünüzü sizə göstərirəm. Mənə nifrət edənlər də özlərini görür, sevənlər də özlərini görürlər. Ümumiyyətlə, aktyorla işləməyi bilən rejissorları sevirəm. Xüsusilə qeyd edim ki, bütün rollarımı sevə-sevə oynayıram. 

Yaxşı rejissorlar çoxdur. Məndə o potensialı görüb, işini mənə həvalə edən rejissorların ümidini heç vaxt puç etmərəm. Göstərilən inamı doğrultmağa çalışıram. Cani könüldən rol üzərində işləyirəm. Bacardığım qədər canfəşanlıq edirəm ki, rolum təbii və gözəl alınsın. Evdə iki övladım varsa, rollarım da mənim balalarım sayılır. 

Hərənin bir həyat tərzi var. Açıq-saçıq səhnələri mahir oynayanlar var. Bundan əlavə, hərənin rolu qavrama və özünküləşdirmə xüsusiyyəti var. Mənə aidiyyatı yoxdur kim hansı rolu onayır. Əsas mənim rolu necə oynamağımdır. Əndazədən çıxmamaq lazımdır. Açıq-saçıq səhnələri mən də istəmərəm. Mən əsl azərbaycanlı qadınıyam və bununla fəxr edirəm. Həyatda da, səhnədə də Azərbaycan qadını olduğumu heç vaxt unutmuram. 

Mənə təqdim olunan bütün rolların layiqincə qiymətini vermək istəyirəm. O rolu elə ifa etməliyəm ki, tamaşaçı  düşünməlidir ki, bu rolu məhz mən oynaya bilərdim, başqası yox…Pis alınacaq bir işə görə, səhnəyə çıxıb özümü biabr etməyə dəyməz. Sənətimlə bağlı ancaq irəli getmək istəyirəm. Cənab Prezident məni "əməkdar artist” fəxri adı ilə təltif edəndə doyunca ağlamışam. İnanıram ki, bundan sonra digər Prezident mükafatlarını da alacam. Dünyanı öz diliylə susdura bilən Prezidentdən mükafatı almaq mənim üçün çox böyük xoşbəxtlikdir. İnşallah ki, oynadığım rollarla xalq artisti adına da layiq görülərəm. Digər bir istəyim isə odur ki, Sumqayıt dövlət Dram Teatrı tezliklə akademik status alsın. Bu bütün teatr kollektivinin arzusudur. 

Sumqayıtın icra başıçısı Zakir Fərəcovun böyük səyi nəticəsində Sumqayıt çox gözəlləşib və abadlaşıb. O bu şəhərin sakini olduğundan, elə sevərək də gözəlləşdirdi. Sumqayıtla bağlı iki gözləntim var. Biri mütləq Sumqayıt güzgüsü və siması sayılan dram teatrının akademik status almağıdır. İnanıram ki, Zakir müəllim bu işin də gündəmə gətirilməsində  və həyata keçirilməsinə səy göstərəcək. İkinci istəyim isə Sumqayıt gənclərinin iş üçün Bakıya gəlmək əvəzinə burada işləməkləridir. Bunun üçün Sumqayıtda daha çox obyektlər, müəssisələr yaradılmalıdır. Bilirsiniz ki, sənət adamları sözün düzünü deməkdən çəkinmirlər. Sözün düzünü biz deməsək, kim deyəcək? Sumqayıtda iş yerləri çoxaldılmalıdır. Elə olmalıdır ki, gənclərimiz sübh tezdən iki saat tıxac ilə Bakıya getməsinlər. Düşünürəm ki, Sumqayıtda yetərincə vakansiya olsa, gənclər Bakıya üz tutmazlar. Atamın bir sözünü sizə də çatdırmaq istəyirəm: "Uzaq yerin buğdasından, yaxın yerin arpası yaxşıdır". Atam Sumqayıtın qurucularından olub. Başını daş üstə qoyub, uzun illər briqadir işləyib. Səhərlər gənclər Bakıya axın etməsin, elə burada Sumqayıtda işləsinlər.

Sizə təşəkkür edirəm. Verdiyiniz suallar çox maraqlı idi. Sizə də işlərinizdə uğurlar arzu edirəm. İncəsənət xadimləri cəmiyyətin güzgüzüsüdür. Onları diqqətdən və sevgidən kənarda qoymaq olmaz.