İstedadlı gənc xanəndə Zəhra Baxışova muğamsevərlərin diqqətini çoxdan çəkib. Musiqiçi ailəsində böyüyən Zəhra Sumqayıt şəhərində anadan olub və hazırda musiqi təhsilini davam etdirir.
Xeberle.com şəhərimizin gənc istedadı Zəhra Baxışova ilə müsahibəni təqdim edir:
- Səni yaxından tanıyaq...
- Mən Baxışova Zəhra Elxan qızı 2009-cu ildə Sumqayıt şəhərində doğulmuşam. Şəhərimizin 36 nömrəli tam orta məktəbinin 9-cu sinif şagirdiyəm. Sumqayıt şəhər Bülbül adına 2 nömrəli UİM-də xanəndəlik üzrə təhsil alıram. Hazırda 3-cü sinifdəyəm, muğam müəllimim Cəmilə Əliyevadır.
- Olubmu ki, oxuduğun yerdə mahnının, qəzəlin sözlərini unutmusan və belə məqamda vəziyyətdən necə çıxmısan?
- Bir çox tədbirlərdə iştirak etməkdəyəm, qəzəlin və ya mahnının sözlərini öyrənmək mənim üçün çətin deyil. Amma səhnədə çıxış edərkən bəzən həyəcandan sözlərini unutduğum zamanlar olur. Bu vaxt köməyimə müəllimim çatır.
- Zaman sürətlə gedir, yeni xanəndələr yetişir. Zamanın nəbzini tutmaq üçün hansı yenilikləri etməyi düşünürsən?
- Əsasən öz üzərimdə işləməyi və daha çox mahnılar öyrənib onları özüm kimi, heç kimə bənzəmədən oxumağa üstünlük verirəm. Və oxuduğum mahnıların, muğamların ruhunu verməyə, onları hiss etməyə çalışıram.
- Ən çox hansı müsabiqə yaddaşında dərin iz buraxıb?
- Bir çox müsabiqədə iştirak etmişəm, qalib olmuşam. 2023-cü ildə "Zəfər Dastanı" müsabiqəsinə qatılmışam və orada 1-ci yerə layiq görülmüşəm. İfa etdiyim mahnı ən sevdiyim xalq mahnılarımızdan "Sarı Bülbül" idi və məhz bu mahnı ilə 1-ci yerə layiq görülməyim mənim üçün yaddaqalan hadisə oldu.
- Hər ifaçının qəlbinə daha yaxın olan bir muğam var. Sənin ruhuna yaxın olan muğam hansıdır?
- Ən sevdiyim, ruhuma ən yaxın olanı "Bayatı-şiraz" muğamıdır.
- Muğamdan başqa hansı musiqini dinləyirsən?
Bayatı-şiraz muğamı ladında olan mahnıları da çox sevərək ifa edirəm. Bu muğam ladında olan mahnıların səsimə daha çox uyğun olduğunu düşünürəm. Daha çox bəstəkar mahnılarımızı sevərək dinləyirəm və eyni zamanda oxuyuram. Bundan başqa dinlədiyim, oxuduğum mahnılar türk arabesk mahnılarıdır. Həzin, lirik növdə olan mahnıları dinləməyi daha çox sevirəm. Eyni zamanda lirik növdə mahnıların səsimə daha çox uyğun olduğunu düşünürəm. Həzin mahnıları oxuyanda özüm də zövq alıram.
- Solo konsert haqqında necə, düşünürsənmi?
- Solo konsertimin olması mənim gələcək hədəflərimdən biridir. Bunun üçün öz üzərimdə işləməliyəm və özümü daha da professional ifaçı kimi yetişdirməliyəm. Qismət olarsa, gələcəkdə bu arzumu reallaşdıracağam.
- Səncə, həmyaşıdlarının musiqi tariximizə, muğamımızın tarixinə münasibəti necədir?
- Bəziləri bəstəkar mahnılarını, muğamlarımızı sevir və dinləyir. Amma, xarici musiqilərə maraq göstərən həmyaşıdlarım da az deyil. Məncə, bu da hər bir yeniyetmənin musiqi zövqündən asılıdır. Gənclərimizin əksəriyyəti milli mahnılarımıza, muğamlarımıza maraq göstərərsə muğamlarımız, mahnılarımız uzun illər keçsə də, yaddaşlarda qalacaq.
- Sumqayıtda konsert proqramlarında iştirak edirsən?
- Sumqayıtda bir neçə şəhər tədbirində xorda, orkestrdə solist olaraq iştirak etmişəm. Daha çox təhsil aldığım Bülbül adına məktəbdə tədbirlərimizdə iştirak edirəm. Elə zamanlar olur ki, Sumqayıtın orta məktəblərində keçirilən tədbirlərdə də çıxış etmək üçün təklif alıram.
- Ailədə sənə ən çox kim dəstək olur?
- Bütün ailə üzvlərim mənə dəstək olur. Bu sənətdə uğurlar qazanmağım ailə üzvlərimi də sevindirir. Mən də hər zaman çalışıram ki, öz uğurlarımla daim ailəmi sevindirim.
- Evdə səndən başqa musiqi ilə məşğul olan varmı?
- Ailəmdə musiqi ilə məşğul olan tək mən deyiləm. Atam tar ixtisası üzrə təhsil alıb və hazırda tar müəllimidir. Bununla yanaşı, klaviş alətində də ifa edir. Bir çox efirlərdə, konsertlərdə çıxış edir.
- Gələcək planların barədə nə deyə bilərsən?
- Gələcəkdə də musiqi sahəsində işlərimi davam etmək istəyirəm. İstəyirəm ki, bu sahədə istədiyim arzularımı reallaşdırımağı planlaşdırıram. Bu sahədə pedaqoji fəaliyyət göstərməyidə düşünürəm.
- Sumqayıtda hansı yenilikləri görmək istəyərsən?
- Şəhərimiz gözəldir, daha da inkişaf etməsini arzulayardım. Ən çox istərdim ki, bu gözəlliyi qoruyub saxlaya bilək. İnsanlar küçə və meydanları, parkları, ictimai yerləri çirkləndirməsinlər, təmizliyə riayət etsinlər!
- Bizə vaxt ayırdığın üçün təşəkkür edirəm.
- Siz sağ olun.
Söhbətləşdi: Elşən Yəhyayev
Xəbərdən istifadə edərkən istinad etmək vacibdir.
